Монгол Улсын Засгийн газраас 2023 оныг Авлигатай тэмцэх жил болгон зарласан шийдвэр, нийгмийн даатгалын салбарын хэмжээнд дэвшүүлсэн зорилтуудыг хэрэгжүүлэх хүрээнд нийгмийн даатгалын хяналт шалгалтын байцаагчдын мэдлэг, ур чадварыг дээшлүүлэх, авлига, ашиг сонирхлын зөрчлөөс урьдчилан сэргийлэх сургалтыг салбарын хэмжээнд өнөөдөр /2023.03.31/ зохион байгууллаа. Сургалтад Нийгмийн даатгалын ерөнхий газар, Нийслэлийн нийгмийн даатгалын ерөнхий газар, БНСУ-ын Хөдөлмөр, нийгмийн хамгаалын үйлчилгээний төвийн Нийгмийн даатгалын тасаг, аймаг, дүүргийн Нийгмийн даатгалын хэлтсийн дарга, хяналт шалгалтын байцаагч нийт 200 гаруй албан хаагч танхим болон цахимаар хамрагдлаа.

Сургалтыг НДЕГ-ын Хяналт шалгалтын газрын дарга Д.Ганзориг чиглүүлэн явуулж, “Нийгмийн даатгалын хууль тогтоомжийн бодлогын хэрэгжилт, зохицуулалт”, “Авлига, ашиг сонирхлын зөрчил түүнээс урьдчилан сэргийлэх нь”, “Хөдөлмөрийн тухай хуулийн шинэчилсэн найруулга, хэрэгжүүлэхэд анхаарах асуудлууд”, “Нийгмийн даатгалын тухай хууль зөрчих зөрчлийг шалгахад анхаарах асуудал”, “Шүүхэд нэхэмжлэл гаргах тухай” сэдвийн хүрээнд ХНХЯ-ны Нийгмийн даатгалын бодлогын хэрэгжилтийг зохицуулах газрын дарга Б.Батжаргал, Хөдөлмөрийн харилцааны бодлогын хэрэгжилтийг зохицуулах газрын Ахлах шинжээч Ш.Мааяа, Т.Мөнгөнцэцэг, АТГ-ын Урьдчилан сэргийлэх, соён гэгээрүүлэх хэлтсийн ажилтан Б.Баяртөгс, НПГ-ын хяналтын прокурор, хууль цаазын ахлах зөвлөх Н.Алтантүлхүүр, МӨХ-ны гишүүн өмгөөлөгч П.Амгаланбаатар нар оролцогчдод мэдээлэл, арга зүйн зөвлөгөө өгч, оролцогчдын сонирхсон асуултад хариуллаа.

Нийгмийн даатгалын ерөнхий газар нь салбарын Авлигын эсрэг үйл ажиллагааны 2023 оны төлөвлөгөөний хүрээнд хяналт шалгалтын үйл ажиллагаа, авлига, ашиг сонирхлын зөрчлөөс урьдчилан сэргийлэх ажлыг үе шаттай зохион байгуулах юм.

 

НИЙГМИЙН ДААТГАЛЫН ЕРӨНХИЙ ГАЗАР