ДАРХАН-УУЛ АЙМАГТ ТӨВИЙН БҮСИЙН САЛБАРЫН АЖИЛТАН, АЛБАН ХААГЧДЫН СУРГАЛТ, ЗӨВЛӨГӨӨН ЗОХИОН БАЙГУУЛАГДЛАА

Төвийн бүсийн аймгуудын хөгжлийн бэрхшээлтэй иргэдийн хөдөлмөр эрхлэлтийг дэмжих жилийн хүрээнд зохион байгуулагдаж буй “Салбарын ажилтан, албан хаагчдын сургалт, зөвлөгөөн” 2026 оны 05 дугаар сарын 22-ны өдөр Дархан-Уул аймагт зохион байгуулагдлаа.

Арга хэмжээг Гэр бүл, хөдөлмөр, нийгмийн хамгааллын сайд Т.Аубакир нээж,  Хөдөлмөрийн чадвар алдсан иргэдийн тоог бууруулах, малчдын сайн дурын даатгалын хамралтыг нэмэгдүүлэх, орон нутгийн нийгмийн даатгалын байцаагч, албан хаагчдын ажлын хариуцлага, ёс суртахуун, мэдлэг ур чадварыг дээшлүүлж, чадавхижуулахад онцгой анхаарахыг үүрэг болголоо.

Түүнчлэн Нийгмийн даатгалын ерөнхий газрын дарга Б.Батжаргал нийгмийн даатгалын хууль тогтоомжийн шинэчлэл, хэрэгжилт болон цаашид салбарын хэмжээнд анхаарах гол асуудлуудын талаар зөвлөгөөнд оролцогчдод мэдээлэл өглөө.

Мөн тус арга хэмжээний үеэр Сэлэнгэ аймгийн Сайхан сумын Нийгмийн даатгалын тасгийн дарга Т.Ганчимэг, Дулаанхаан тосгоны нийгмийн даатгалын байцаагч Г.Алтандөл нар Нийгмийн хамгааллын салбарын “Хүндэт жуух” бичгээр шагнагдлаа.