Гадаад харилцааны яам, “Хилийн чанад дахь монголчуудын зөвлөл” НҮТББ-тай хамтран зохион байгуулж байгаа “Хилийн чанад дахь монголчуудын нэгдсэн чуулга уулзалт” өнөөдөр / 2026.07.30 / эхэллээ. Энэхүү чуулга уулзалтад Нийгмийн даатгалын ерөнхий газрын дарга Б.Батжаргал оролцож, Нийгмийн хамгааллын хэлэлцээрийн талаарх мэдээллийг чуулганд оролцогчдод өгсөн юм.
Хилийн чанадад ажиллаж, амьдарч байгаа монголчуудын нийгмийн хамгааллын асуудлыг шийдвэрлэх хүрээнд Монгол улс Оросын Холбооны Улс, Бүгд Найрамдах Солонгос улс, Бүгд Найрамдах Унгар улс, Бүгд Найрамдах Польш улс, Бүгд Найрамдах Турк улс, Бүгд Найрамдах Чех улс, Бүгд Найрамдах Казакстан улс, Бүгд Найрамдах Австри улс зэрэг 8 улстай нийгмийн хамгааллын хэлэлцээрийг байгуулан ажиллаж байна. Тус улсуудтай хийсэн хэлэлцээрийн хүрээнд иргэд хоёр улсад ажиллаж, нийгмийн даатгалын шимтгэл төлсөн хугацаагаа өөрийн улсдаа шимтгэл төлснөөр нэгтгэн тооцуулж, өндөр насны, хөдөлмөрийн чадвар алдсаны, тэжээгчээ алдсаны тэтгэвэр авах эрх зүйн үндэс бүрдэж, нийгмийн хамгааллын баталгаа нь сайжрах нөхцөл бүрдэж байгаа билээ.
Өнөөдрийн чуулга уулзалтаар хилийн чанадад амьдарч, ажиллаж, сурч буй монгол иргэдийн хууль ёсны эрх ашгийг хамгаалах, иргэдийн нийгмийн асуудлыг шийдвэрлэх зэрэг асуудлуудыг авч хэлэлцсэн бөгөөд 40 гаруй улсад үйл ажиллагаа явуулж байгаа 180 гаруй холбоо, ТББ-ын төлөөлөл, төрийн болон олон улсын тусламжийн байгууллага, бизнесийн холбоод зэрэг нийт 200 гаруй зочид, төлөөлөгчид оролцлоо.
