Нийгмийн даатгалын ерөнхий газраас хилийн чанадад ажиллаж, амьдарч байгаа Монгол Улсын иргэдэд нийгмийн даатгалын үйлчилгээг хүргэх, Нийгмийн даатгалын хууль тогтоомжийг сурталчлах ажлыг үе шаттайгаар тасралтгүй зохион байгуулж байна.
Энэ ажлын хүрээнд Нийгмийн даатгалын ерөнхий газрын дарга Б.Батжаргал, Бодлогын хэрэгжилт, төлөвлөлтийн газрын дарга Ц.Ганцэцэг болон холбогдох мэргэжилтнүүд “Хилийн чанад дахь монголчуудын зөвлөл” НҮТББ-ын төлөөллийг хүлээн авч уулзлаа. Уулзалтаар талууд дэлхийн өнцөг булан бүрт амьдарч, ажиллаж байгаа Монголчууддаа нийгмийн даатгалын үйлчилгээг хүргэх чиглэлээр хамтран ажиллах санамж бичгийн хүрээнд хийгдэж байгаа ажлын хэрэгжилт, үр дүн, цаашид хийж хэрэгжүүлэх ажлын талаар санал солилцлоо.
Гадаадад ажиллаж амьдарч байгаа Монголчуудад нийгмийн даатгалын хууль тогтоомж, ач холбогдол, нийгмийн хамгааллын хэлэлцээрийг сурталчлах, цахим уулзалтыг улирал бүр зохион байгуулах, сайн дурын даатгалд хамруулах, тэдэнд нийгмийн даатгалын үйлчилгээ үзүүлэх, түүнчлэн 2027 оны 01 дүгээр сарын 01-нээс эхлэн мөрдөх Нийгмийн даатгалын багц хуульд орсон нэмэлт, өөрчлөлтийн талаар мэдээлэл өгөх зэрэг арга хэмжээг Хилийн чанад дахь Монголчуудын зөвлөлтэй хамтран зохион байгуулахаар боллоо.
