Танд туслах хэрэглэгчийн лавлах

7777-1289
НүүрМэдээТэтгэврийн зээлийн хүүг дахин буурууллаа

Тэтгэврийн зээлийн хүүг дахин буурууллаа

Монгол Улсын хэмжээнд 381.8 мянган иргэн нийгмийн даатгалын байгууллагаас  сар бүр тэтгэвэр авч байна. Харин тэдгээрийн 60 хувь буюу 230.8 мянган тэтгэвэр авагч арилжааны банкнаас тэтгэвэр барьцаасан зээл хэлбэрээр 680.9 тэрбум төгрөг авсан байдалтай байна.

Нийгмийн даатгалын ерөнхий газар нь Монгол Улсын Засгийн Газрын 2016-2020 оны үйл ажиллагааны хөтөлбөрт тусгагдсан тэтгэврийн зээлийн хүүг үе шаттайгаар бууруулах зорилтын хүрээнд тэтгэвэр авагчдад 6 хүртэлх сарын тэтгэвэртэй тэнцэх хэмжээний зээлийг 15 хувийн хүүтэйгээр олгох ажлыг 2017 оны 01 дүгээр сарын 16-наас эхлүүлсэн билээ.

Тэтгэврийн зээлийн жилийн хүүг ийнхүү 18 хувиас 3 хувиар бууруулснаар 2017 онд нийт  95600 тэтгэвэр авагч 76,3 тэрбум төгрөгийн зээлийг сарын 1.25 хувь, жилийн 15.0 хувийн хүүтэйгээр авч, 1,3 тэрбум төгрөгийн зээлийн хүүгийн дарамтаас чөлөөлөгдсөн байна.

Тэгвэл 2018 оны 01 дүгээр сарын 16 буюу өнөөдрөөс эхлэн зээлийн хүүг дахин бууруулж байна. Тодруулбал,  нийт тэтгэвэр авагчдын 91.8 хувь нь үйлчлүүлдэг ХААН банк болон Төрийн банктай хамтран 12 сар хүртлэх тэтгэврийн 70%-тай  тэнцэх хэмжээний зээлийн хүүг 3-6 пунктээр бууруулж, сарын 1 хувь, жилийн 12 хувь болголоо.

Арван хоёр сараас урт хугацаагаар зээл авахыг хүсвэл банкны эх үүсвэрээр олгогдож байгаа 18 хувийн хүүтэй зээл авах боломж нь тэтгэвэр авагчдад нээлттэй хэвээр үлдэж байгаа юм.

Мөн тэтгэвэр авагчид өмнө нь тэтгэврээ 100% зээл болон зээлийн  хүүд нь төлдөг байсан бол цаашид 70 хувийг төлүүлж, 30 хувийг өөрт нь олгохоор зохицуулсан байна. Ингэснээр тэд сар бүр тогтмол орлоготой үлдэж, ахмад настны нийгмийн баталгаа хангагдахад тодорхой нөлөө үзүүлэх юм.

 

НИЙГМИЙН ДААТГАЛЫН  ЕРӨНХИЙ ГАЗАР