“СУРГАЛТ, ХӨГЖЛИЙН ӨДӨР – 2026” АРГА ХЭМЖЭЭ АМЖИЛТТАЙ ЗОХИОН БАЙГУУЛАГДЛАА
Гэр бүл, хөдөлмөр, нийгмийн хамгааллын яамны харьяа байгууллагуудын мэдлэг, судалгаа, үр дүн, сайн туршлагыг харилцан солилцох, хүний нөөцийн чадамжийг хөгжүүлэх зорилготой “Салбарын хүний нөөцийн чадамж ба тасралтгүй хөгжил” сэдэвт “Салбарын мэдлэгийн индэр–2026” форумын үргэлжлэл болгон өнөөдөр (2026 оны 10 дугаар сарын 30-ны өдөр) Хүн ам, хөдөлмөр, нийгмийн хамгааллын сургалт, судалгааны хүрээлэнгээс Нийгмийн даатгалын ерөнхий газрын албан хаагчдад зориулсан “Сургалт, хөгжлийн өдөр–2026” уулзалт-сургалтыг зохион байгууллаа.
Тус уулзалт-сургалтад Нийгмийн даатгалын ерөнхий газрын болон нийслэлийн 6 дүүргийн Нийгмийн даатгалын газрын нийт 50 албан хаагч хамрагдаж, байгууллагын болон салбарын хөгжлийн чиг хандлага, хувь хүний ур чадвар, чадамж, багийн ажиллагаа болон ажлын бүтээмжийг дээшлүүлэх чиглэлээр мэдээлэл авлаа.
Сургалтад Хүн ам, хөдөлмөр, нийгмийн хамгааллын сургалт, судалгааны хүрээлэнгийн Сургалтын газрын дарга М.Гантуяа “Бид хэн бэ, бидний чиг хандлага, хаашаа чиглэж байна вэ?”, Сургалтын хөтөлбөрийн хэлтсийн дарга Ц.Баатарболд 2027 оны хөгжлийн чиглэл -бидний эхний алхам сэдэвт илтгэлийг тус тус танилцуулсан юм.
Мөн оролцогчид “Надад чаддаг зүйл бий” хэсгээр дотоод нөөц бололцоогоо тодорхойлон, “Би ямар шийдвэр гаргах вэ” чадамжийн мини сорилд хамрагдаж шийдвэр гаргах чадвараа сорилоо. Үүнээс гадна албан хаагчид ажлын байранд тулгардаг бодит асуудлуудыг багийн ажиллагаагаар хамтдаа тодорхойлж, шийдэл боловсруулах интерактив дадлагад идэвхтэй оролцсон байна.
Энэхүү сургалт нь албан хаагчдын мэдлэг, чадамжийг дээшлүүлэх, багийн ажиллагааг сайжруулах, улмаар байгууллагын хөгжилд хувь нэмэр оруулах чухал ач холбогдолтой сургалт боллоо.
