Нийгмийн даатгалын сангийн болон нийгмийн даатгалын байгууллагуудын үйл ажиллагааны урсгал зардлын 2027 оны төсвийн төсөл, 2028-2029 оны төсөөллийн саналыг Төсвийн тухай хуулийн 8 дугаар зүйлийн 8.4 дэх хэсэг, Нийгмийн даатгалын ерөнхий хуулийн 14 дүгээр зүйлийн 14.2 дахь хэсэг, Сангийн яамны “Төсвийн ерөнхийлөн захирагч нарын 2027 оны төсвийн төсөл бэлтгэх удирдамж”-ийн дагуу боловсруулж Нийгмийн даатгалын ерөнхий газрын удирдлагын баг (2026.07.20)-ийн хурлаар хэлэлцэн Гэр бүл, хөдөлмөр, нийгмийн хамгааллын яаманд хүргүүлэхээр шийдвэрлэлээ.
2027 оны төсвийн жил нь Улсын Их Хурлын 2026 оны 07 дугаар сарын 02-ны өдрийн хуралдаанаар баталсан Нийгмийн даатгалын ерөнхий хуульд нэмэлт, өөрчлөлт оруулах тухай, Нийгмийн даатгалын сангаас олгох тэтгэврийн тухай хуульд нэмэлт, өөрчлөлт оруулах тухай, Нийгмийн даатгалын сангаас олгох тэтгэмжийн тухай хуульд нэмэлт, өөрчлөлт оруулах тухай, Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хуульд нэмэлт, өөрчлөлт оруулах тухай хуулийн хэрэгжилтийг эхлүүлэх онцлог жил юм.
Төсвийн төсөлд Нийгмийн даатгалын багц хуульд орсон нэмэлт, өөрчлөлтийн дагуу 55/60 насанд хүрсэн нийгмийн даатгалын сангаас тэтгэвэр авч байгаа болон цэргийн тэтгэвэр авагчид улсын төсвөөс суурь тэтгэвэр олгох, шимтгэл төлөгч- даатгуулагчид тэтгэврийн мөнгөн хуримтлалтай болох, ажил олгогчид, даатгуулагчдад шимтгэлийн хөнгөлөлт, чөлөөлөлт үзүүлэх зэрэг арга хэмжээг тусгасан болно.
