НИЙГМИЙН ДААТГАЛЫН БАЙГУУЛЛАГААС ТЭТГЭВЭРТ ГАРСАН АХМАД АЖИЛТНУУДТАЙ “ҮЕ ҮЕИЙН ЗАЛГАМЖ ХОЛБОО – ТУРШЛАГА, МЭДЛЭГИЙН ӨВ” УУЛЗАЛТ, СУРГАЛТЫГ ЗОХИОН БАЙГУУЛЛАА
2026 оны 11 дүгээр сарын 05-ны өдөр Нийгмийн даатгалын ерөнхий газар “Үе үеийн залгамж холбоо – Туршлага, мэдлэгийн өв” сэдэвт уулзалт, сургалтыг амжилттай зохион байгууллаа.
Тус арга хэмжээнд Нийгмийн даатгалын байгууллагаас тэтгэвэрт гарсан ахмад ажилтнууд хүрэлцэн ирсэн бөгөөд салбартаа олон жил үр бүтээлтэй ажилласан ахмадуудаа хүлээн авч хүндэтгэл үзүүлэх, хууль тогтоомжийн нэмэлт, өөрчлөлт болон цахим үйлчилгээний талаар мэдээлэл хүргэх, үе үеийн залгамж холбоог бэхжүүлэх зорилгоор зохион байгуулсан юм.
Уулзалтын эхэнд Нийгмийн даатгалын ерөнхий газрын дарга Б.Батжаргал ахмад ажилтнуудыг хүлээн авч, хүндэтгэл үзүүлэв. Үргэлжлүүлэн Бодлогын хэрэгжилт, төлөвлөлтийн газрын дарга Ц.Ганцэцэг Нийгмийн даатгалын хууль тогтоомжийн шинэчлэл, нэмэлт, өөрчлөлт болон хэрэгжилтийн талаар танилцуулга хийсэн бол Дотоод аудит, мониторингийн газрын дарга Б.Ганхуяг байгууллагын өнөөгийн хөгжил, цахим шинэчлэлийн чиглэлээр хийгдэж буй ажлуудыг танилцууллаа.
Арга хэмжээний үеэр ахмад ажилтнуудад Нийгмийн даатгалын багц хуулийн нэмэлт, өөрчлөлт болон шинэчлэлийн талаар бусдад сургалт явуулах, зөвлөгөө өгөх эрх бүхий “Сургагч багш”-ийн батламжийг гардуулсан юм.
Уулзалт “Өвлөгдөх туршлага – Үнэт зүйлс” сэдэвт чөлөөт ярилцлагаар үргэлжилж, ахмад ажилтнууд мэдлэг, туршлага, үнэт зүйлсээ харилцан солилцон, дурсгалын зураг татуулснаар өндөрлөлөө.
