МОНГОЛ УЛСЫН ЗАСГИЙН ГАЗРЫН “ХҮНДЭТ ӨРГӨМЖЛӨЛ” ХҮРТЛЭЭ
Төрийн бодлого шийдвэрийг хэрэгжүүлэх үйлсэд үнэтэй хувь нэмэр оруулж, салбарын хөгжил дэвшилд идэвх зүтгэл гарган, мэдлэг чадвараа дайчилж, манлайлан ажилласан албан хаагчдын гавьяа зүтгэлийг Монгол Улсын Засгийн газраас жил бүр онцлон үнэлж, Хүндэт өргөмжлөл, цомоор шагнан урамшуулдаг.
Тулгар төрийн 2235 жил, Их монгол улсын 820 жил, Үндэсний эрх чөлөө, тусгаар тогтнолоо сэргээн мандуулсны 115, Ардын хувьсгалын 105 жилийн ой тохиолдуулан Гэр бүл, хөдөлмөр, нийгмийн хамгааллын салбараас Нийгмийн даатгалын ерөнхий газрын дэргэдэх Мэдээллийн технологийн төвийн захирал Г.Хүрэлбаатар тус шагналыг хүртэж, Монгол улсын Ерөнхий сайд Н.Учралаас шагналаа /2026.07.07/ гардан авлаа.
Г.Хүрэлбаатар нь улсад 39 дахь жилдээ ажиллаж байгаа бөгөөд үүнээс нийгмийн хамгааллын салбарт 25 дах жилдээ ажиллаж байна. Нийгмийн даатгалын салбарт 25 жил ажиллах хугацаандаа мэдээллийн дэвшилтэт технологид суурилсан нийгмийн даатгалын бүтээгдэхүүн үйлчилгээг тогтмол хөгжүүлж, сүлжээ болон техник хангамжийн бааз суурийг өргөтгөх, программ хангамж, сервис хөгжүүлэх арга хэмжээг шат дараатайгаар амжилттай удирдан зохион байгуулж ажилласан. Түүнчлэн нийгмийн даатгалын салбарын хэмжээнд хууль тогтоомжийн хэрэгжилтийг хангах, нийгмийн даатгалын үйлчилгээ мэдээллийн технологид суурилан амжилттай хэрэгжүүлэхэд Г.Хүрэлбаатар захирлын хувь оролцоо асар өндөр юм.
Энэ шагнал нь жил бүрийн улсын баяр наадмын өмнө салбар бүрээс 1 албан хаагчийг шалгаруулан шагнадаг бөгөөд энэ онд гэр бүл, хөдөлмөр, нийгмийн хамгааллын салбараас Г.Хүрэлбаатар захирал ийнхүү гардан авлаа.
