ДЭЛХИЙН БАНКНЫ ТӨСЛИЙН БАГ НИЙГМИЙН ДААТГАЛЫН ЕРӨНХИЙ ГАЗАРТ АЖИЛЛАЛАА
Дэлхийн банкны Хувийн хэвшлийн ахлах мэргэжилтэн Комал Мохиндра, хувийн хэвшлийн мэргэжилтэн Вентинг вэй нараар ахлуулсан “Монгол Улсын эдийн засгийг төрөлжүүлэх, ногоон шилжилтийг дэмжих зорилгоор хувийн хэвшлийн хөрөнгө оруулалт, хөрөнгийн эх үүсвэрийг татах боломжийг бүрдүүлэх” техник туслалцааны төслийн баг Нийгмийн даатгалын ерөнхий газарт ажиллалаа. Төслийн багийн гишүүдийг Нийгмийн даатгалын ерөнхий газрын дарга Б.Батжаргал болон холбогдох газар, хэлтсийн дарга нар хүлээн авч уулзлаа.
Тус төслийн багийнхан Эдийн засаг, хөгжлийн яамтай хамтран ажиллаж байгаа бөгөөд Монгол Улсын бизнесийн бүртгэлийн эрх зүйн болон институци, технологийн орчин, тогтолцоо, хууль, журам, үйл ажиллагаанд үнэлгээ хийж, холбогдох тайлан, зөвлөмжийг өгөхөөр ажиллаж байгаа юм байна.
Энэхүү уулзалтын эхэнд Нийгмийн даатгалын ерөнхий газрын дарга Б.Батжаргал нийгмийн даатгалын үйл ажиллагааны талаар товч мэдээллийг өгч, төслийн багийн гишүүдээс ирүүлсэн хуулийн этгээдийн нийгмийн даатгалын шимтгэл төлөгчөөр бүртгүүлэх хүсэлтийг шийдвэрлэх, бүртгэлтэй хуулийн этгээдийн мэдээллийг өөрчлөх, шинэчлэх, даатгуулагч бүртгэх, даатгуулагчийн мэдээллийг өөрчлөх, шинэчлэх, баяжуулах, нийгмийн даатгалын шимтгэл төлөлтийн тайлан гаргалт, улсын бүртгэлийн, татварын болон гадаадын иргэн, харьяатын байгууллагатай мэдээлэл солилцох үйл ажиллагаа, мэдээллийн нэгдсэн систем, мэдээллийн хадгалалт, хамгаалалт, аюулгүй байдал, үйлчилгээний цахимжуулалт зэрэг асуултуудад холбогдох албан тушаалтнууд дэлгэрэнгүй мэдээллийг өглөө.
