Танд туслах хэрэглэгчийн лавлах

7777-1289
НүүрМэдээБНСУ-д ажиллахаар очиж буй монгол иргэдийг тогтмол сургалтанд хамруулж байна

БНСУ-д ажиллахаар очиж буй монгол иргэдийг тогтмол сургалтанд хамруулж байна

ХАХНХЯ-ны харьяа БНСУ дахь Нийгмийн хамгааллын үйлчилгээний төв нь 2013 оны 08 сараас эхлэн Гёнги аймгийн Ёжү хот дахь Солонгосын хөдөлмөрийн сангийн харьяа Гадаад ажилчдын сургалтын төвтэй хамтран хөдөлмөрийн гэрээгээр ажиллахаар Солонгост очиж  байгаа Монгол иргэдэд тогтмол сургалт явуулж байна.

Тус сургалтанд 2013 онд 1215, 2014 онд 989, 2015 онд 492 иргэнийг тус хамрууллаа. Сургалтаар хөдөлмөрийн гэрээгээр ажиллахаар очсон Монгол иргэдэд Монгол Улсын Засгийн газар, БНСУ-ын Засгийн Газрын хооронд байгуулсан “Нийгмийн хамгааллын хэлэлцээр”, Монгол Улсын Нийгмийн даатгалын хууль, нийгмийн даатгалын ач холбогдол, БНСУ-д хөдөлмөрийн гэрээгээр ажиллаж байгаа Монгол иргэдийн тэтгэврийн даатгал, БНСУ-ын Үндэсний тэтгэврийн даатгалаас чөлөөлөгдөх тухай ойлголтууд болон БНСУ дахь Нийгмийн хамгааллын үйлчилгээний төвийн үйл ажиллагааг танилцуулж байна.

Энэ оны 04 сараас эхлэн Монгол Улсаас БНСУ-д суугаа Элчин сайдын яамтай хамтран иргэдэд гэмт хэргээс урьдчилан сэргийлэх талаар мэдээллийг мөн хүргэж эхлээд байна. Тэрчлэн иргэдийн сонирхсон асуултанд хариулт өгч, Нийгмийн хамгааллын үйлчилгээний төвтэй холбоо барих танилцуулах хуудсыг тараан, шаардлагатай үед холбогдож мэдээлэл, зөвлөгөө авах боломжийг бүрдүүлж ажиллаж байгаа нь гадаадын оронд байгаа иргэдийнхээ нийгмийн хамгааллыг сайжруулах чиглэлд ахиц авчирч байна. Сургалт 7 хоног бүрийн Лхагва гаригт Гёнги аймгийн Ёжү хот дахь Солонгосын хөдөлмөрийн сангийн харьяа Гадаад ажилчдын сургалтын төвд 17:20 цагаас зохион байгуулагдаж байна.

Солонгос улсад ажиллаж, сурч амьдарч байгаа монгол иргэд та бүхэн нийгмийн даатгал болон нийгмийн халамж, гэр бүл хүүхэд хамгааллын талаар зөвлөгөө мэдээлэл авахыг хүсвэл Хүн амын хөгжил, нийгмийн хамгааллын яамны харъяа БНСУ дахь Нийгмийн хамгааллын үйлчилгээний төв Даваа-Баасан, Ням гаригуудад 09:00-18:00 цагийн хооронд нээлттэй ажиллаж байна. Жич: Солонгос улсын бүх нийтийн амралт, баярын өдрүүдэд хуваарийн дагуу ажиллана.

Хаяг: Тундэмүнёгса мүнхуа гунвон ёог ( 동대문역사문화공원역) 4-р гарц замын эсрэг талд White Horse барилгын 9-н давхарт

Харилцах утас: 02-2278-8030, 02-2278-8034