БАЯНХОНГОР АЙМГИЙН ГЭР БҮЛ, ХӨДӨЛМӨР, НИЙГМИЙН ХАМГААЛЛЫН САЛБАРЫН АЖИЛТНУУДАД НИЙГМИЙН ДААТГАЛЫН ХУУЛИЙН ШИНЭЧЛЭЛИЙН ТӨСЛИЙГ ТАНИЛЦУУЛЛАА
Гэр бүл, хөдөлмөр, нийгмийн хамгааллын сайд Т.Аубакир болон харьяа агентлаг, салбарын дарга нар Баянхонгор аймагт ажиллаж байна. Тус аймгийн гэр бүл, хөдөлмөр, нийгмийн хамгааллын салбарын албан хаагчдтай уулзалт хийж, Гэр бүл хөдөлмөр, нийгмийн хамгааллын яамнаас УИХ-д өргөн мэдүүлээд байгаа хуулийн төслүүдийн талаар танилцуулсан. Энэ үеэр Нийгмийн даатгалын ерөнхий газрын дарга Б.Батжаргал Нийгмийн даатгалын багц хуулийн нэмэлт, өөрчлөлтийн төсөл, Хувийн нэмэлт тэтгэврийн тухай хуулийн төслийн хэлэлцүүлгийг зохион байгуулж, хуулийн төслийн дараах зохицуулалтуудыг онцлон тайлбарласан юм.
Хуульд тусгасан онцлог зүйл заалтаас дурдвал Шимтгэлийн уян хатан нөхцөл буюу сайн дурын даатгуулагч, хувиараа хөдөлмөр эрхлэгчдэд нийцсэн шимтгэл төлөлтийн шинэ орчныг бүрдүүлсэн байна. Мөн ажил олгогчдыг дэмжих хүрээнд Ажил олгогчийн төлдөг шимтгэлийг шатлалтай бууруулах, гарааны бизнесийг дэмжих хөнгөлөлт үзүүлэхээр хуульд тусгасан байна.
Мөн тэтгэврийн тогтолцооны 6 гол шинэчлэл болон 11 бүлэг 49 зүйлтэй Хувийн нэмэлт тэтгэврийн тухай хуулийн төслийн танилцуулж, тэтгэврийн даатгалын тогтолцоог сайжруулах, залуу үеийнхний ирээдүйн санхүүгийн баталгааг урт хугацаанд найдвартай бүрдүүлэх, сайн дураараа хуримтлал үүсгэж, ирээдүйн тэтгэврээ өсгөн арвижуулах эрх зүйн зохицуулалтыг тусгажээ.
Хэлэлцүүлгийн үеэр салбарын албан хаагчдаас гаргасан санал, хүсэлтийг хуулийн төсөлд тусган ажиллах юм.
