ЦАХИМ СУРГАЛТ, ХЭЛЭЛЦҮҮЛЭГ ЗОХИОН БАЙГУУЛЛАА
Нийгмийн даатгалын ерөнхий газрын дэргэдэх Эрүүл мэндийн магадлалын төв зөвлөлөөс “Хөдөлмөрийн чадвар алдалтыг бууруулах, түүнээс урьдчилан сэргийлэхэд анхаарах асуудлууд” сэдэвт цахим сургалт, хэлэлцүүлгийг 2026 оны 10 дугаар сарын 02-ны өдөр зохион байгууллаа.
Тус сургалт, хэлэлцүүлгийг Нийгмийн даатгалын ерөнхий газрын дарга Б.Батжаргал нээж, Баян-Өлгий, Говь-Алтай, Дорнод, Завхан, Сэлэнгэ, Увс аймгуудад хөдөлмөрийн чадвар алдалтын хувь, хугацаа тогтоолгосон иргэдийн тоо улсын дунджаас өндөр байгааг анхаарч, түүнийг бууруулах болон урьдчилан сэргийлэх чиглэлээр бодитой арга хэмжээ авч ажиллахыг онцлон үүрэг болгов.
Энэ удаагийн сургалт, хэлэлцүүлэгт дээрх аймгуудын Эрүүл мэндийн магадлалын зөвлөлийн дарга, гишүүд болон хөдөлмөрийн чадвар алдалтыг шийдвэрлэх үйл ажиллагаанд оролцож буй эрүүл мэндийн байгууллагын 90 гаруй эмч, мэргэжилтэн хамрагдлаа. Энэхүү арга хэмжээ нь хөдөлмөрийн чадвар алдалтын тэргүүлэх шалтгаан болж буй өвчлөлийг бууруулах, урьдчилан сэргийлэх арга замын талаар хэлэлцэн, туршлага солилцож, цаашид авч хэрэгжүүлэх арга хэмжээний чиглэлийг тодорхойлсноороо онцлог, ач холбогдолтой болсон юм.
