ХӨРӨНГИЙН ОРУУЛАЛТ, ХӨРӨНГИЙН ЗАХ ЗЭЭЛИЙН ТАЛААР АЛБАН ХААГЧДАД МЭДЭЭЛЭЛ ӨГЛӨӨ
Нийгмийн даатгалын ерөнхий хууль болон Монгол Улсын Засгийн газрын 2024 оны 254 дүгээр тогтоолоор баталсан “Нийгмийн даатгалын сангийн чөлөөт үлдэгдлийг санхүүгийн хэрэгсэлд хөрөнгө оруулах журам”, 256 дугаар тогтоолоор баталсан “Тэтгэврийн нөөц санд хөрөнгө төвлөрүүлэх, бүртгэх, хуваарилах, байршуулах, мэдээлэх, хөрөнгө оруулах, өвлүүлэх, хяналт тавих журам”-д заасны дагуу нийгмийн даатгалын сангийн чөлөөт үлдэгдэл, Тэтгэврийн нөөц сангийн хөрөнгийг найдвартай, үр өгөөжтэй, ил тод, хараат бус байх зарчмыг баримтлан Засгийн газрын үнэт цаас, Монголбанкны үнэт цаас худалдан авах, Төрийн сангийн нэгдсэн дансанд байршуулах мөнгөн хадгаламж, банкны системд нөлөө бүхий арилжааны банканд мөнгөн хадгаламж хэлбэрээр байршуулах гэсэн 4 төрлийн санхүүгийн хэрэгсэлд хөрөнгө оруулахаар зохицуулсан.
Энэ хүрээнд Нийгмийн даатгалын байгууллага 2024-2026 онд сангийн чөлөөт үлдэгдэл болон Тэтгэврийн нөөц сангийн хөрөнгийг санхүүгийн найдвартай хэрэгсэлд оруулах, өсгөн нэмэгдүүлэх зорилтын хүрээнд 385 тэрбум төгрөгөөр Засгийн газрын бонд авч, сангийн хөрөнгийг 119.1 тэрбум төгрөгөөр нэмэгдүүлэх боломжийг бүрдүүлсэн. Мөн 2025 онд нийгмийн даатгалын сангийн чөлөөт үлдэгдэл болон Тэтгэврийн нөөц сангийн хөрөнгөөс 915.3 тэрбум төгрөгийг Монголбанкнаас тодорхойлсон системийн нөлөө бүхий арилжааны 4 банканд хугацаатай хадгаламж хэлбэрээр нэг жилийн хугацаатай банкуудад байршуулснаар Нийгмийн даатгалын сангийн чөлөөт үлдэгдлийг 137.5 тэрбум төгрөгөөр өсгөн нэмэгдүүлэх боломж бүрдэж байгаа юм.
Нийгмийн даатгалын сангийн хөрөнгийн менежменттэй холбоотойгоор албан хаагчдын мэдлэг, мэдээллийг нэмэгдүүлэх зорилгоор 2025 оны 01 дүгээр сарын 23-ны өдрийн “Мэдээллийн цаг”-аар Монголын хөрөнгийн биржийн Бизнес хөгжил хариуцсан ахлах мэргэжилтэн П.Нямдорж, Сургалт олон нийт хариуцсан мэргэжилтэн С.Оюунханд нар “Хөрөнгө оруулалт, хөрөнгийн зах зээлийн үндсэн ойлголт” сэдвээр сургалт орлоо. Цаашид энэхүү сургалтыг үе шаттайгаар зохион байгуулахаар хоёр байгууллага тохиролцсон.
