ХӨДӨЛМӨРИЙН ЧАДВАР ТҮР АЛДАЛТАД НӨЛӨӨЛЖ БУЙ ХҮЧИН ЗҮЙЛСИЙГ ТОДОРХОЙЛОХ ЗОРИЛГООР ТООН МЭДЭЭЛЭЛД ДҮН ШИНЖИЛГЭЭ ХИЙЛЭЭ
Нийгмийн даатгалын сангаас олгох тэтгэмжийн тухай хууль, Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хуульд заасны дагуу Нийгмийн даатгалын байгууллага нь даатгуулагчийн хөдөлмөрийн чадвар түр алдсан хугацааны тэтгэмжийг эрүүл мэндийн байгууллагаас бичиж олгосон эмнэлгийн хуудсанд үндэслэн олгож байна. Энэхүү хууль эрхзүйн зохицуулалтын хэрэгжилт, тэтгэмж олголтын бодит нөхцөл байдлыг үнэлэх зорилгоор Нийгмийн даатгалын ерөнхий газрын дэргэдэх Эрүүл мэндийн магадлалын төв зөвлөлөөс 2022-2025 оны 10 дугаар сар хүртэлх хугацааны нийгмийн даатгалын байгууллагын цахим мэдээллийн санд тулгуурлан дүн шинжилгээ хийлээ.
Эмнэлгийн хуудас бичилт олголтыг насны бүлгээр авч үзэхэд нь 31–50 насны даатгуулагчид зонхилох хувийг эзэлж байна. Хөдөлмөрийн чадвар түр алдалтад хүргэж буй гол шалтгаанд гэмтэл, осол, мөн дотор эрхтний (зүрх судас, хоол боловсруулах, шээс бэлгийн замын өвчин) өвчлөл зонхилж байна. Салбарын ангиллаар авч үзвэл уул уурхай, барилга угсралт, тээврийн салбаруудад ахуйн осол, гэмтлийн шалтгаант эмнэлгийн хуудасны эзлэх хувь харьцангуй өндөр байгаа нь хөдөлмөрийн нөхцөл, эрсдэлийн онцлогтой шууд холбоотой байна.
Энэхүү дүн шинжилгээг хийснээр хөдөлмөрийн чадвар түр алдалтад нөлөөлж буй хүчин зүйлсийг тодорхойлох, урьдчилан сэргийлэх арга хэмжээг салбарын онцлогт нийцүүлэн төлөвлөх, хөдөлмөрийн аюулгүй байдлыг сайжруулах, цаашлаад нийгмийн даатгалын сангийн зардлыг оновчтой, тогтвортой төлөвлөхөд чухал ач холбогдолтой юм. Дэлгэрэнгүй судалгаа, дүн шинжилгээтэй доорх холбоосоор орж танилцана уу.
