САНАМЖ БИЧИГ БАЙГУУЛЛАА
2026 оны 03 дугаар сарын 22-ны өдөр зохион байгуулагдсан “1000 жолоочийн чуулга уулзалт”-ын үеэр нийгмийн даатгалын хамрах хүрээг нэмэгдүүлэх, UBCAB компанийн харилцагч жолооч нарын нийгмийн баталгааг хангах, төр, хувийн хэвшлийн хамтын ажиллагааг бэхжүүлэх зорилгоор Нийгмийн даатгалын ерөнхий газар болон “UBCAB” ХХК хамтран ажиллах “Санамж бичиг”-ийг байгууллаа. Санамж бичигт Нийгмийн даатгалын ерөнхий газрын дарга Б.Батжаргал, “UBCAB” ХХК-ийн гүйцэтгэх захирал О.Золбаяр нар гарын үсэг зурлаа.
Санамж бичгийн хүрээнд UBCAB компанийн 100 мянга гаруй харилцагч жолооч нарын нийгмийн баталгааг хангах, тогтмол орлоготой боловч нийгмийн даатгалд хамрагдаагүй 30 мянга гаруй жолоочийг сайн дурын даатгалд хамруулах, нийгмийн даатгалын ач холбогдлыг сурталчлан таниулах, мөн даатгалын үйлчилгээг жолооч нарт илүү хялбар, хүртээмжтэй хэлбэрээр хүргэх чиглэлээр талууд хамтран хэрэгжүүлхээр тохиролцов.
“1000 жолоочийн чуулга уулзалт”-ын үеэр “Нийгмийн даатгалд сайн дураар даатгуулахын ач холбогдол” сэдвээр танилцуулга хийж, Хан-Уул дүүргийн Нийгмийн даатгалын хэлтэс-ийн байцаагч нар жолооч нарт нийгмийн даатгалын зөвлөгөө, мэдээллийг газар дээр нь хүргэн ажиллалаа.
