НЭЭЛТТЭЙ ӨДӨРЛӨГӨӨР 600 ОРЧИМ ИРГЭНД ҮЙЛЧИЛГЭЭ, ЗӨВЛӨГӨӨ МЭДЭЭЛЭЛ ХҮРГЭЛЭЭ
Монгол Улсын Засгийн газраас дэвшүүлж буй “Чөлөөлье” санаачилгын хүрээнд Гэр бүл, хөдөлмөр, нийгмийн хамгааллын салбарын нээлттэй өдөрлөг хоёр өдрийн турш Сүхбаатарын талбайд амжилттай үргэлжилж өндөрлөлөө.
Тус өдөрлөгт Нийгмийн даатгалын ерөнхий газар болон Баянгол, Баянзүрх, Чингэлтэй, Хан-Уул, Сүхбаатар, Сонгинохайрхан дүүргийн Нийгмийн даатгалын газрууд хамтран оролцож, 600 орчим иргэн, даатгуулагчид сайн дурын даатгал, шимтгэл төлөлт, тэтгэвэр, тэтгэмж тогтоолт, баримт бичиг бүрдүүлэлт болон хөдөлмөрийн чадвар алдалтын хувь, хугацаа тогтоолт зэрэг чиглэлээр зөвлөгөө, үйлчилгээг нэг дороос шуурхай хүргэж ажиллав.
Өдөрлөгийн эхний өдөр буюу 2026 оны 06 дугаар сарын 29-нд иргэд мэдээлэл, зөвлөгөөг түлхүү авсан бол хоёр дахь өдөр буюу 06 дугаар сарын 30-ны өдөр бичиг баримтын бүрдлээ хангаж ирэн, газар дээр нь асуудлаа шийдвэрлүүлж, үйлчилгээ авснаараа онцлог байлаа.
Мөн үйлчилгээний чанар, хүртээмжийг үнэлэх, иргэдийн санал хүсэлтэд тулгуурлан үйл ажиллагаагаа сайжруулах зорилгоор иргэдээс сэтгэл ханамжийн судалгаа авч ажилласан юм.
Нийгмийн даатгалын байгууллага нь үйлчилгээгээ иргэд, даатгуулагчдад улам ойртуулах, цахим үйлчилгээг өргөжүүлэх, ил тод, нээлттэй байдлыг хангахад тогтмол зорин ажиллаж байна.
