НИЙГМИЙН ДААТГАЛЫН УЛСЫН БАЙЦААГЧИЙН ШАЛГАЛТАД 255 АЛБАН ХААГЧ ОРОЛЦЛОО
Нийгмийн даатгалын ерөнхий хуулийн 38 дугаар зүйлд заасны дагуу Нийгмийн даатгалын улсын байцаагчийн эрх олгох, баталгаажуулах шалгалтыг жил бүр зохион байгуулдаг. Энэ шалгалтыг 2026 оны 04 дүгээр сарын 25-ны өдөр зохион байгуулж, шалгалтад Нийгмийн даатгалын ерөнхий газар болон аймаг, дүүргийн Нийгмийн даатгалын газрын 255 албан хаагч оролцлоо.
Улсын байцаагчийн шалгалтыг Нийгмийн даатгалын ерөнхий газрын дарга Б.Батжаргал, Захиргаа, удирдлагын газрын дарга Б.Даваахүү нар нээж, шалгалтад оролцож байгаа нийт албан хаагчдад амжилт хүслээ.
Нийгмийн даатгалын хууль тогтоомжийн хэрэгжилтэд хяналт тавих, сурталчлан таниулах, ажил олгогч, даатгуулагчдад нийгмийн даатгалын үйлчилгээг тасралтгүй, түргэн, шуурхай үзүүлэхэд нийгмийн даатгалын байцаагч, ажилтнуудын мэдлэг, мэргэжлийн ур чадвар чухал юм. Иймд Нийгмийн даатгалын байгууллагын албан хаагчид Улсын байцаагчийн шалгалтад тэнцэн эрх авснаар төрийн үйлчилгээ мэргэшсэн тогтвортой байх зарчим хангагдах, ажил олгогч, даатгуулагч, харилцагчдад нийгмийн даатгалын үйлчилгээг ёс зүйтэй, шуурхай хүргэх, мэргэжлийн ур чадвар нэмэгдэхээс гадна, мэргэшлийн зэрэгтэй болж, улмаар цалин хөлс нэмэгдэх боломж бүрдэх юм.
Улсын байцаагчийн шалгалтыг 1997 оноос эхлэн авч эхэлсэн бөгөөд ерөнхий мэдлэгийн сорил, онол арга зүйн сорил, албан хэрэг хөтлөлтийн сорил шалгалт гэсэн 3 шалгалтыг амжилттай өгсөн байцаагчид “Нийгмийн даатгалын улсын байцаагч” эрх авч байна.
