НИЙГМИЙН ДААТГАЛЫН БАЙГУУЛЛАГА ТӨРИЙН АЛБАН ХААГЧИЙН ГҮЙЦЭТГЭЛИЙГ ИЛ ТОД НЭЭЛТТЭЙ ҮНЭЛДЭГ БОЛНО
Засгийн газрын 2024-2028 оны үйл ажиллагааны хөтөлбөрт төрийн байгууллагын үйл ажиллагааны үр нөлөөг дээшлүүлж, төрийн албан хаагчийн бүтээмжийг нэмэгдүүлэн, хариуцлага, ил тод байдлыг хангаж, гүйцэтгэлийн үнэлгээг боловсронгуй болгохоор заасан.
Энэ зорилтыг хангах, төрийн бүтээмжийг нэмэгдүүлэх, шударга үнэлгээний тогтолцоог бий болгохын тулд Засгийн газраас төрийн албан хаагчийн гүйцэтгэлийн удирдлагын нэгдсэн цахим системийг төрийн байгууллагуудын үйл ажиллагаанд нэвтрүүлэхээр туршилтын ажил эхэлж байна. Уг системийг туршихаар төрийн 15 байгууллага сонгогдсоны нэг нь Нийгмийн даатгалын ерөнхий газар болон түүний харьяа байгууллагууд юм.
Тус цахим системийг туршихтай холбоотой болон 2026 оныг “Ёс зүй, сахилга, хариуцлага, хяналт, бүтээмжийг дээшлүүлэх жил” болгон зарласан, “Нийгмийн даатгалын салбарын 2025-2028 оны стратеги төлөвлөгөө”, “Авлигатай тэмцэх үндэсний хөтөлбөр 2023-2030”, “Төрийн албаны үйл ажиллагаанд тавих ерөнхий шаардлага, стандарт MNS 7068:2025” болон бусад асуудлын талаар Захиргаа, удирдлагын газрын дарга Б.Даваахүү НДЕГ-ын болон аймаг, дүүргийн НДГ-ын албан хаагчдад мэдээлэл өглөө.
Төрийн албан хаагчийн гүйцэтгэлийн удирдлагын нэгдсэн цахим системийг нэвтрүүлснээр гүйцэтгэл, үнэлгээ илүү бодитой, уялдаатай болох, бүтээмж нэмэгдэх, шийдвэр гаргалтын процесс, шат дамжлагыг хөнгөвчлөх, зарцуулах хугацаа багасах, зардал буурах, энэ хэрээр иргэд, даатгуулагчид, ажил олгогч, харилцагчдад хүрэх үйлчилгээний хүртээмж нэмэгдэж, ил тод нээлттэй болох бололцоо бүрдэх юм.
