БҮГД НАЙРАМДАХ ТУРК УЛСАД АЖИЛЛАЖ, АМЬДАРЧ БАЙГАА МОНГОЛЧУУДДАА МЭДЭЭЛЭЛ ХҮРГЭЛЭЭ
Нийгмийн даатгалын байгууллага нийгмийн даатгалын хууль тогтоомжийн хэрэгжилтийг хангах, олон нийтэд сурталчлах ажлыг шат дараатай зохион байгуулж байна. Үүний дотор хилийн чанадад ажиллаж, амьдарч байгаа Монголчуудынхаа нийгмийн хамгааллын асуудлыг шийдвэрлэх ямар боломж, бололцоо байгаа талаар мэдээлэл өгөх цахим уулзалтыг шат дараатай хийсээр байгаа юм.
Тус ажлын хүрээнд Нийгмийн даатгалын ерөнхий газар Монгол Улсаас Бүгд найрамдах Турк Улсад суугаа Элчин сайдын яамтай хамтран Бүгд найрамдах Турк Улсад оршин суугаа иргэдэд нийгмийн хамгаалал (тэтгэвэр, тэтгэмж)-ийн асуудлаар 2026 оны 01 дүгээр сарын 25-ны өдөр цахимаар зөвлөгөө, мэдээлэл өглөө.
Энэ удаагийн цахим уулзалтад Монгол улсаас БНТУ-д суугаа элчин сайдын яамны 1 дүгээр нарийн бичгийн дарга Н.Бадрал оролцож, Нийгмийн даатгалын ерөнхий газрын холбогдох газрын мэргэжилтнүүд болон Олон улсын хэлэлцээр, Сайн дурын даатгал, Тэтгэвэр, тэтгэмжийн даатгалын асуудлаар мэдээлэл өгч, цахимаар оролцож байгаа иргэдийн сонирхсон асуултад хариуллаа.
“Нийгмийн хамгааллын тухай Монгол Улс болон Бүгд Найрамдах Турк Улс хоорондын хэлэлцээр”-т 2018 онд талууд гар үсэг зурж, 2021 оноос хэрэгжиж эхэлсэн. Энэхүү хэлэлцээрээр хоёр улсын иргэд буюу Монгол улс болон Бүгд найрамдах Турк улсад шимтгэл төлж, ажилласан давхардаагүй хугацаагаа нэгтгэн тооцуулж, өндөр насны, хөдөлмөрийн чадвар алдсаны, тэжээгчээ алдсаны тэтгэвэр авах эрх зүйн үндэс бүрдэж, нийгмийн хамгааллын баталгаа нь сайжрах ач холбогдолтой юм.
