Танд туслах хэрэглэгчийн лавлах

7777-1289
НүүрМэдээ“E-ndaatgal цахим хөтөлбөр” сургалт эхэллээ

“E-ndaatgal цахим хөтөлбөр” сургалт эхэллээ

“E-NDAATGAL цахим хөтөлбөр” сургалтын нэгдүгээр шат өнөөдөр /2020.11.03/ Хөдөлмөр, нийгмийн хамгааллын яаманд эхэллээ.

Нийгмийн даатгалын байгууллага нь цахим үйлчилгээг хөгжүүлж, иргэд даатгуулагчдад шуурхай, чирэгдэлгүй үйлчлэх зорилгоор 60 гаруй програм хангамжийг хэрэглээнд ашиглаж байгаагийн дотор гар утасны аппликэйшн, цахим архив, сайн дурын даатгалын цахим систем зэрэг багтаж байгаа юм. Өнөөдрийн сургалтаар дээрх системүүдийн талаар нэг мөр ойлголт өгч, системийн ашиглалттай холбоотой нэгжүүдэд тулгамдаж байгаа асуудлуудыг хэлэлцэн шийдвэрлэх зорилготой.

Сургалтын үйл ажиллагааг Нийгмийн даатгалын ерөнхий газрын дарга Д.Зоригт нээж “Засгийн газар болон агентлагийн түвшинд олон шинэ санаачилга, үйлчилгээний сайжруулалт, бодлогын өөрчлөлт хийж байгаа ч эцсийн үр дүнг даатгуулагчийн сэтгэл ханамж илэрхийлнэ. Иймд өдөр бүр иргэдтэй ойр ажиллаж байгаа байцаагч, ажилтнууд нэгдсэн ойлголт, мэдлэгтэй байх нь чухал” гэдгийг онцоллоо.

Хөдөлмөр нийгмийн хамгааллын сайд Ариунзаяа хэлсэн үгэндээ “Төрийн албан хаагч бол төрийн нүүр царай юм. Иргэн авах ёстой үйлчилгээгээ авахын тулд хүнд сурталтай нүүр тулах ёсгүй. Иймд харилцаа, хандлагаа сайжруулж, иргэн бүрт сэтгэлээсээ үйлчлэх шаардлагатай” гэсэн юм. Тус сургалтад Нийгмийн даатгалын ерөнхий газрын удирдлагууд, дүүргүүдийн нийгмийн даатгалын хэлтсийн дарга, үйлчилгээний тасгийн дарга, тэтгэвэр, тэтгэмж, орлого шимтгэл, хяналт шалгалт, сайн дурын даатгалын байцаагч нар, сургалт хариуцсан мэргэжилтнүүд болон архивын ажилтнууд нийт 100 албан хаагч оролцож байна.