НИЙГМИЙН ДААТГАЛЫН БАЙГУУЛЛАГА “ABILITY EXPO” ЦОГЦ АРГА ХЭМЖЭЭНД ОРОЛЦОЖ, ХӨГЖЛИЙН БЭРХШЭЭЛТЭЙ ИРГЭДЭД ҮЙЛЧИЛГЭЭ ҮЗҮҮЛЛЭЭ
2026 оны 11 дүгээр сарын 4-ний өдөр Үйлдвэрчний эвлэлийн соёлын төв ордонд “Хөгжлийн бэрхшээлтэй иргэдийн хөдөлмөр эрхлэлтийг дэмжих жил”-ийн хүрээнд зохион байгуулагдсан “Ability Expo” цогц арга хэмжээнд Нийгмийн даатгалын байгууллага идэвхтэй оролцож, иргэдэд чиглэсэн олон талт үйл ажиллагааг амжилттай хэрэгжүүллээ.
Арга хэмжээний нээлтэд Гэр бүл, хөдөлмөр, нийгмийн хамгааллын яамны Төрийн нарийн бичгийн дарга А.Даваажаргал оролцсон бөгөөд Нийгмийн даатгалын ерөнхий газрын дарга Б.Батжаргал “Нийгмийн даатгалын байгууллагаас хөгжлийн бэрхшээлтэй иргэдэд үзүүлж буй үйлчилгээ”-ний талаар илтгэл тавьж, салбарын бодлого, үйлчилгээг танилцуулав.
Мөн арга хэмжээний үеэр Баянгол дүүргийн нийгмийн даатгалын газрын албан хаагчид иргэдэд нийгмийн даатгалын үйлчилгээний талаар зөвлөгөө, мэдээлэл өгч ажиллалаа.
Тус өдөрлөгт Гэр бүл, хөдөлмөр, нийгмийн хамгааллын яам, Нийгмийн даатгалын ерөнхий газар, Хөдөлмөр, халамжийн үйлчилгээний ерөнхий газар, Хөгжлийн бэрхшээлтэй хүний хөгжлийн ерөнхий газар зэрэг байгууллагууд хамтран оролцож, салбар дундын уялдаа холбоог ханган ажилласан юм.
Энэхүү цогц арга хэмжээ нь хөгжлийн бэрхшээлтэй иргэдийн хөдөлмөр эрхлэлтийг дэмжих, тэдэнд үзүүлэх нийгмийн хамгаалал болон даатгалын үйлчилгээг илүү хүртээмжтэй болгох, хууль эрх зүйн шинэчлэлийг сурталчлан таниулахад чухал ач холбогдолтой үйл явдал болов.
