ӨВӨРХАНГАЙ АЙМГИЙН АЖ АХУЙН НЭГЖ, БАЙГУУЛЛАГЫН ТӨЛӨӨЛӨЛД НИЙГМИЙН ДААТГАЛЫН БАГЦ ХУУЛИЙН НЭМЭЛТ, ӨӨРЧЛӨЛТИЙН ТӨСЛИЙГ ТАНИЛЦУУЛЛАА
Нийгмийн даатгалын ерөнхий газрын дарга Б.Батжаргал Өвөрхангай аймагт 2026 оны 06 дугаар сарын 27-ны өдөр ажиллалаа. Энэ үеэрээ Өвөрхангай аймагт ажиллаж байгаа аж ахуйн нэгжийн удирдлагууд, нягтлан бодогч гээд 500 гаруй хүнд Нийгмийн даатгалын хуулийн шинэчлэлийн төслийн хэлэлцүүлгийг зохион байгуулж, Гэр бүл, хөдөлмөр, нийгмийн хамгааллын яамнаас боловсруулсан хуулийн төслийн дараах зохицуулалтуудыг онцлон тайлбарлав.
Хуульд тусгасан онцлог зүйл заалтаас дурдвал олон эх үүсвэрээс тэтгэвэр авах боломж бүрдэх, Шимтгэлийн уян хатан нөхцөл буюу сайн дурын даатгуулагч, хувиараа хөдөлмөр эрхлэгчдэд нийцсэн шимтгэл төлөлтийн шинэ орчныг бүрдүүлсэн байна. Мөн ажил олгогчдыг дэмжих хүрээнд ажил олгогчийн төлдөг шимтгэлийн дээд хязгаарыг үе шатлалтай бууруулах, гарааны бизнесийг дэмжих хөнгөлөлт үзүүлэхээр хуульд тусгасан байна. Мөн Хувийн нэмэлт тэтгэврийн тухай хуулийн төсөлд сайн дураараа хуримтлал үүсгэж, ирээдүйн тэтгэврээ өсгөн арвижуулах эрх зүйн зохицуулалтыг тусгажээ.
Хэлэлцүүлэгт оролцсон аж ахуйн нэгжийн удирдлагууд, нягтлан бодогчид хуулийн төсөлтэй холбоотой санал хүсэлтээ илэрхийлж, эдгээр саналуудыг хуулийн төсөлд тусган ажиллахаа илэрхийллээ.
