АВЛИГАТАЙ ТЭМЦЭХ ГАЗРЫН УРЬДЧИЛАН СЭРГИЙЛЭХ, СОЁН

ГЭГЭЭРҮҮЛЭХ ХЭЛТЭСТЭЙ ХАМТРАН СУРГАЛТ ЗОХИОН БАЙГУУЛЛАА

Нийгмийн даатгалын ерөнхий газрын дэргэдэх Эрүүл мэндийн магадлах төв зөвлөлөөс Авлигатай тэмцэх газрын урьдчилан сэргийлэх, соён гэгээрүүлэх хэлтэстэй хамтран жил бүр зохион байгуулдаг авлига, ашиг сонирхлын зөрчлөөс урьдчилан сэргийлэх, авлигын гэмт хэргийн талаарх сургалтыг танхим болон цахим хэлбэрээр 2026 оны 05 дугаар сарын 29-ний өдөр зохион байгуулав.

Сургалтад салбар болон аймаг, дүүргийн Эрүүл мэндийн магадлалын 31 зөвлөлийн 200 гаруй дарга, гишүүдийг хамруулсан бөгөөд Авлигатай тэмцэх газрын урьдчилан сэргийлэх, соён гэгээрүүлэх хэлтсийн комиссар н.Төрбулаг “Авлига, ашиг сонирхлын зөрчлөөс урьдчилан сэргийлэх, авлигын гэмт хэрэг” сэдвээр, Нийгмийн даатгалын ерөнхий газрын Захиргаа удирдлагын газрын дарга Б.Даваахүү “Төрийн албан хаагчийн ёс зүйн тухай хуулийн хэрэглээ, анхаарах асуудал” сэдвээр хичээл зааж мэдээлэл өгөв.

Энэ удаагийн сургалтаар авлига, ашиг сонирхлын зөрчил болон төрийн албан хаагчын ёс зүйн зөрчлөөс урьдчилан сэргийлэхэд анхаарах асуудлууд, төрийн албан хаагчийн ёс зүйн зарчим, үнэт зүйлсийг үйл ажиллагаандаа хэрэгжүүлэх, төрийн үйлчилгээг шударга, ил тод үзүүлэх талаар тодорхой тохиолдол, кейсийг хэлэлцэж, оролцогчдын асуултад хариулж, санал солилцов.