“ХӨДӨЛМӨРИЙН АЮУЛГҮЙ БАЙДАЛ, ЭРҮҮЛ МЭНДИЙН УРЬДЧИЛАН СЭРГИЙЛЭЛТИЙН ЦОГЦ АЯН–2026” ОРОН НУТАГТ ҮРГЭЛЖИЛЖ БАЙНА
Үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх, ажилтны эрүүл мэндийг хамгаалах, аюулгүй ажиллагааны соёлыг төлөвшүүлэх чиглэлээр Гэр бүл, хөдөлмөр, нийгмийн хамгааллын яамнаас үе шаттай арга хэмжээнүүдийг зохион байгуулж байна. Энэ ажлын хүрээнд “ХӨДӨЛМӨРИЙН АЮУЛГҮЙ БАЙДАЛ, ЭРҮҮЛ МЭНДИЙН УРЬДЧИЛАН СЭРГИЙЛЭЛТИЙН ЦОГЦ АЯН-2026” арга хэмжээг өнгөрсөн 4 дүгээр сараас эхлэн зохион байгуулсан. Тэгвэл тус аян орон нутагт үргэлжилж байна.
Нийгмийн даатгалын сангаас олгох Үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хуулийн хүрээнд иргэд, даатгуулагчдыг үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх “Хөдөлмөрийн аюулгүй байдал, эрүүл мэндийн урьдчилан сэргийлэлтийн цогц аян”-ы арга хэмжээг Хөдөлмөрийн аюулгүй байдал, эрүүл мэндийн төвтэй хамтран 2026 оны 05 дугаар сарын 20-21-ний өдрүүдэд Сэлэнгэ аймагт зохион байгуулж, ажил олгогч, хувиараа хөдөлмөр эрхлэгчдийн төлөөлөл, 1000 гаруй иргэн даатгуулагч хамрууллаа. Аяны хүрээнд:
- Үйлдвэрлэлийн осол, мэргэжлээс шалтгаалсан өвчний даатгалын үйл ажиллагаа, хууль тогтоомжийг сурталчлах;
- Үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх хөдөлмөрийн аюулгүй байдал, эрүүл ахуйн чиглэлээр сургалт;
- Ажлын байрны хөдөлмөрийн нөхцөл, эрсдэлийн үнэлгээ хийх;
- Мэргэжлээс шалтгаалсан өвчний үзлэг, тандалт зохион байгуулах;
- Урьдчилан сэргийлэх чиглэлийн мэргэжил, арга зүйн зөвлөгөө өгөх зэрэг цогц арга хэмжээг хэрэгжүүллээ.
Үндэсний хэмжээнд зохион байгуулагдаж байгаа энэхүү аяныг Гэр бүл, хөдөлмөр, нийгмийн хамгааллын яам, Хөдөлмөрийн аюулгүй байдал, эрүүл мэндийн үндэсний хороо, Хөдөлмөр, халамжийн үйлчилгээний ерөнхий газар, Хөдөлмөрийн аюулгүй байдал, эрүүл мэндийн төв хамтран зохион байгуулж байгаа юм. Тус аяныг улсын хэмжээнд зохион байгуулснаар Үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх, хөдөлмөрийн аюулгүй байдал, эрүүл мэндийн урьдчилан сэргийлэх тогтолцоог бэхжүүлэх, ажлын байрны эрсдэлийг бууруулах, иргэдийг хөдөлмөрийн чадвар алдалтаас урьдчилан сэргийлэх, чадвар алдсан иргэдийн тоог бууруулах зорилготой. Цаашид тус үйл ажиллагаа орон даяар зохион байгуулах юм.
