Нэгдсэн Үндэстний Байгууллагын 80 жилийн ойг тохиолдуулан Нийгмийн даатгалын байгууллага болон Олон улсын хөдөлмөрийн байгууллагын хамтын ажиллагааны талаар товч танилцуулж байна.
Олон улсын хөдөлмөрийн байгууллагын дэмжлэгтэйгээр “Нийгмийн даатгалын үндсэн зарчмууд” сэдэвт сургалтыг 1992 онд анх хамтран зохион байгуулснаар хамтын ажиллагааны эхлэл тавигдсан билээ. 1993 онд Үндэсний семинар зохион байгуулж “Монголын нийгмийн даатгалын үзэл баримтлал, үндсэн концепц”-ийг хэлэлцэж зөвлөмж гаргасан бөгөөд 2017 онд “Нийгмийн даатгалын шинэчлэл-өнөөгийн байдал, цаашдын чиг хандлага” сэдэвт олон улсын форумыг нийгмийн даатгалын харилцаанд оролцогч талууд болон олон улсын хамтрагч байгууллагын төлөөллийн хүрээнд амжилттай зохион байгуулав. Нийгмийн хамгааллын салбарт “Малчдын нийгмийн хамгааллыг өргөжүүлж, цочролд хариу үзүүлэх бэлэн байдлыг нэмэгдүүлэх нь” хамтарсан хөтөлбөрийг 2020-2022 онд малчдын эрүүл мэнд, нийгмийн даатгалын хамралтыг нэмэгдүүлэх зорилгоор баруун 8 аймагт хэрэгжүүлэв.
Нийгмийн даатгалын төв болон салбар нэгжүүдийг хамруулсан “Нийгмийн даатгалын хамрах хүрээг өргөтгөх захиргааны шийдлүүд” сэдэвт сургалт, төрийн болон төрийн бус байгууллага, олон улсын байгууллагыг хамруулсан “Малчдын нийгмийн даатгалын хамралтыг нэмэгдүүлэх нь” сэдэвт хэлэлцүүлгийг 2024 онд, нийгмийн даатгалын албан хаагчдыг чадавхжуулах мэдээллийн системийн сургалтыг 2025 онд тус тус зохион байгуулсан бөгөөд нийгмийн даатгалын хамралтыг нэмэгдүүлэх чиглэлээр богино видео, бичлэг, гарын авлага, танилцуулга боловсруулан, шаардлагатай тоног төхөөрөмжийн дэмжлэг үзүүлсэнд салбарын хамт олон талархалтай ханддаг.