АВСТРИ УЛСАД АЖИЛЛАЖ, АМЬДАРЧ БАЙГАА МОНГОЛЧУУДДАА МЭДЭЭЛЭЛ ХҮРГЭЛЭЭ
Нийгмийн даатгалын ерөнхий газар Монгол Улсаас Австри Улсад суугаа Элчин сайдын яамтай хамтран Австри Улсад оршин суугаа иргэдэд нийгмийн хамгаалал (тэтгэвэр, тэтгэмж)-ийн асуудлаар 2025 оны 10 дугаар сарын 12-ны өдөр цахимаар зөвлөгөө, мэдээлэл өглөө.
Нийгмийн даатгалын ерөнхий газрын холбогдох газрын мэргэжилтнүүд Олон улсын хэлэлцээр, Сайн дурын даатгал, Тэтгэвэр, тэтгэмжийн даатгалын асуудлаар мэдээлэл өгч, цахимаар оролцож байгаа иргэдийн сонирхсон асуултад хариуллаа.
Нийгмийн даатгалын байгууллага нийгмийн даатгалын хууль тогтоомжийн хэрэгжилтийг хангах, олон нийтэд сурталчлах ажлыг шат дараатай зохион байгуулж байна. Үүний дотор хилийн чанадад ажиллаж, амьдарч байгаа Монголчуудынхаа нийгмийн хамгааллын асуудлыг шийдвэрлэх, тэдэнд нийгмийн асуудлаа шийдэх ямар боломж, бололцоо байгаа талаар мэдээлэл өгөх цахим уулзалтыг цаашид тогтмол зохион байгуулахаар төлөвлөн ажиллаж байна.
Дашрамд дуулгахад “Нийгмийн хамгааллын тухай Монгол Улс болон Бүгд Найрамдах Австри Улс хоорондын хэлэлцээр”-ийг өнгөрсөн 2025 оны 05 дугаар сард хоёр улсын сайд нар гарын үсэг зурж, Тус хэлэлцээрийг хэрэгжүүлэх удирдлагын тохиролцоог Монгол Улсын талаас Гэр бүл, хөдөлмөр, нийгмийн хамгааллын сайд Т.Аубакир, Бүгд Найрамдах Австри улсын талаас Хөдөлмөр, нийгмийн хэрэг, эрүүл мэнд, асрахуй, хэрэглэгчийг хамгаалах сайд Коринна Шуман нар 2025 оны 09 дүгээр сарын 16-ны өдөр гарын үсэг зурж баталсан.
Энэхүү хэлэлцээр хэрэгжсэнээр иргэд нийгмийн даатгалын шимтгэлийг хоёр улсад давхар төлөхөөс чөлөөлөгдөх, хоёр улсад ажиллаж, даатгалын шимтгэл төлсөн хугацаагаа өөрийн улсдаа шимтгэл төлснөөр нэгтгэн тооцуулж, өндөр насны, хөдөлмөрийн чадвар алдсаны, тэжээгчээ алдсаны тэтгэвэр авах эрх зүйн үндэс бүрдэж, нийгмийн хамгааллын баталгаа нь сайжрах ач холбогдолтой.
