БАЛЖИННЯМЫН ЖАМЪЯН

/1931-2025/

Нийгмийн даатгалын байгууллагын ахмад, удирдах ажилтан Монгол Улсын Гавьяат эдийн засагч Балжиннямын Жамъян нь таалал төгсөж, гэр бүл, ах дүү, хамт олон бидэнд хүнд гарз тохиолоо.

Б.Жамъян нь 1931 онд Өвөрхангай аймгийн Гүн-Нарийн (одоогийн Хайрхандулаан) суманд төрсөн, ажлын гараагаа 1951-1953 Сайд нарын зөвлөлийн харьяа нягтлан бодогчийн курс, Санхүү Эдийн Засгийн Техникумд мэргэжлийн багш, 1958-1961 онд Сангийн яамны хэлтэс, газрын дарга, 1961-1968 онд Аж үйлдвэрийн яамны 1-р орлогч Сайд, 1968-1975 онд Хөнгөн Хүнсний үйлдвэрийн яамны орлогч Сайд, 1975-1979 онд Эдийн засгийн харилцан туслалцах зөвлөлд Нарийн бичгийн дарга, зөвлөх, 1979-1988 Хөдөлмөр, нийгэм хангамжийн улсын хороонд Орлогч дарга бөгөөд Улсын нийгмийн хангамжийн ерөнхий газрын дарга, 1988-1991 онд Улсын нийгмийн хангамжийн газарт газрын даргаар ажиллаж байгаад гавьяаныхаа амралтанд гарсан. Нийгмийн даатгалын ерөнхий газрын Ахмадын хороог үүсгэн байгуулж, 1995-2018 онуудад тус хорооны даргаар ажиллаж, залуу ахмад үеийн холбоог бэхжүүлэх ахмад настнуудыг анхааран халамжлах талаар олон төрлийн ажил зохион байгуулж хэрэгжүүлсэн ахмад настан юм.

Б.Жамъян нь улсад нийт 40 гаруй жил ажиллахдаа улсын нийгэм хангамжийн нэгдсэн тогтолцоог шинээр бүрдүүлж хөгжүүлэх, иргэдийн тэтгэвэр, тэтгэмж, асрамж үйлчилгээ нийгмийн хамгааллын талаарх төрийн бодлогыг тодорхойлж, бүх төрлийн тэтгэвэр, тэтгэмжтэй холбогдсон хууль, дүрэм, заавар, журмыг боловсронгуй болгож шинэчлэх, тэдгээрийг сурталчлан таниулж, амьдралд хэрэгжүүлэх, хөрөнгийн зарцуулалтанд тавих хяналтын тогтолцоог бий болгож тэтгэврийн хуулийг шинэчлэн батлуулж мөрдүүлэх, нийгмийн хамгааллын хуучин тогтолцоог зах зээлийн эдийн засгийн харилцаанд нийцүүлэх угтвар нөхцөлийг бүрдүүлэх, нийгэм хангамжийн салбарын төсөв, төлөвлөгөө, бүртгэл тооцооны ажлыг шинэчлэн сайжруулах, нийгэм хангамжийн албыг өргөтгөх, сумдыг орон тооны ажилтантай болгож, боловсон хүчнээр бэхжүүлэх үйлсэд үнэтэй хувь нэмэр оруулсан билээ.

Монгол Улсад нийгмийн даатгалын тогтолцоог бэхжүүлэх, нийгмийн даатгалын болон тэтгэврийн эрх зүйн шинэчлэлийг хэрэгжүүлэх талаар залуу үедээ үнэтэй сургамж, зөвлөгөө өгч өөрийн мэдлэг, ажлын ур чадвараа хойч үедээ өвлүүлж, эзэмшүүлсэн манлайлагч ахмадуудын нэг байсан юм.

Талийгаачийн эдийн засаг, нийгмийн салбарын хагжилд оруулсан хувь нэмрийг нь үнэлэн яам, газар, олон нийтийн байгууллагын тэргүүний ажилтан, цол, тэмдэг, ойн медалиуд, “Хөдөлмөрийн хүндэт медаль”, “Алтан гадас”, “Хөдөлмөрийн гавьяаны улаан тугийн одон”, Монгол Улсын “Гавьяат эдийн засагч” цолоор тус тус шагнасан байна.

Талийгаачийн гэр бүл, байгууллага хамт олныгоо гэсэн элгэн халуун сэтгэл, хөдөлмөрч, шулуун шударга, ажилч хичээнгүй зан чанар нь бидний сэтгэл зүрхэнд үүрд мөнхөд хоногшин үлдэж, үеийн үед дурсагдах болно.

Талийгаачийн гэр бүл, үр хүүхэд, төрөл төрөгсдөд гүн эмгэнэл илэрхийлье.

Эрхэм хүмүүн Та тэнгэрийн орондоо амгалан орших болтугай.

НИЙГМИЙН ДААТГАЛЫН ЕРӨНХИЙ ГАЗАР

АЙМАГ, ДҮҮРГИЙН НИЙГМИЙН ДААТГАЛЫН ГАЗАР