КАПИТАЛ БАНКНЫ ӨР ТӨЛБӨРИЙГ ТӨЛҮҮЛЖ БАЙНА
Монгол Улсын Ерөнхий сайдын 2025 оны 75 дугаар захирамжаар “Төлбөрийн чадваргүйн улмаас санхүүгийн эрсдэлд орсон, татан буугдсан банканд байршиж байсан тусгай зохицуулалтын сан (нийгмийн даатгалын сан, эрүүл мэндийн даатгалын сан, хөдөлмөр эрхлэлтийг дэмжих сан), төрийн байгууллага, төрийн өмчит хуулийн этгээдийн хөрөнгийг буцаан төвлөрүүлж, төрийг хохиролгүй болгох ажлыг зохион байгуулах” ажлын хэсэг байгуулагдан ажиллаж байна.
Тус ажлын хэсгийн үйл ажиллагааны хүрээнд Капитал банкаас нийгмийн даатгалын сангийн өр төлбөрт тооцон хөрөнгө хүлээн авах ажлыг зохион байгууллаа.

Капитал банкны эрх хүлээн авагчаас 1.21 тэрбум төгрөгийн үнэлгээ бүхий 9 ширхэг үл хөдлөх хөрөнгийг өр төлбөрт тооцон хүлээн авснаар нийтдээ 40.02 тэрбум төгрөгийн өр барагдаж, 64.2 тэрбум төгрөгийн үлдэгдэлтэй байна.
Ерөнхий сайдын захирамжаар байгуулагдсан ажлын хэсгийн хүрээнд Капитал банк болон Чингис хаан банк ХХК-иас нийт 149.2 тэрбум төгрөгийн өр төлбөрийн үлдэгдлийг барагдуулах чиглэлээр холбогдох эрх бүхий байгууллагуудтай хамтран ажиллаж байна.