ТЭТГЭВРИЙН ХУВИЙН ХЭРГИЙН ЦАХИМЖУУЛАЛТЫН ЯВЦЫН ТАЛААР ТУРШЛАГА СОЛИЛЦОХ ЦАХИМ УУЛЗАЛТ ЗОХИОН БАЙГУУЛЛАА
Нийгмийн даатгалын байгууллага нь тэтгэврийн хувийн хэргийг цахимжуулах ажлыг салбарын хэмжээнд зохион байгуулан ажиллаж байна. Энэ ажлын хүрээнд 2025 оны 07 дугаар сарын 06-ны өдөр тэтгэврийн хувийн хэргийн цахимжилтын явцын талаарх туршлага солилцох цахим уулзалтыг зохион байгуулж, НДЕГ-ын холбогдох газрын дарга нар, мэргэжилтнүүд, аймаг, дүүргийн Нийгмийн даатгалын газрын дарга, хэлтсийн дарга нар оролцлоо.
Уулзалтаар одоо ашиглаж байгаа тэтгэврийн цахим хувийн хэргийн программын давуу болон сул тал цаашид хэрхэн ашиглах талаар санал солилцсон бөгөөд Баянхонгор, Өвөрхангай, Увс аймгийн Нийгмийн даатгалын газрын дарга нар тэтгэврийн хувийн хэргийг цахимжуулах ажлыг хэрхэн зохион байгуулсан талаар товч мэдээлэл хийж, Баянхонгор аймаг 13614, Өвөрхангай аймаг 20320, Увс аймаг 13300 хувийн хэргийг бүрэн цахимжуулсан үр дүнг танилцуулсан байна.
Баянхонгор аймгийн Нийгмийн даатгалын газрын дарга Б.Азжаргал, Өвөрхангай аймгийн Нийгмийн даатгалын газрын дарга Н.Норгинбадам нар тус программыг нэвтрүүлснээр байцаагч ажилтнуудын ажлын ачааллыг бууруулан, мэдээлэл лавлагаа авч буй иргэдэд хүндрэл, чирэгдэл үүсгэхгүй, тэтгэврийн хувийн хэргийн тооллого хийхэд хялбар болсон, цаашид программыг сайжруулалт хийж мэдээллийн нэгдсэн сан үүсгэж, салбарын хэмжээнд ашиглах боломжтой зэрэг ач холбогдолтойг онцолсон байна.
Цахим уулзалтад оролцогчид тэтгэврийн хувийн хэргийг цахимжуулах программыг нийгмийн даатгалын мэдээллийн шинэ системд (SICOS)-д холбох, хөгжүүлэх боломжийг судлах, ашиглаж буй тоног төхөөрөмж, серверийг сайжруулах, хурдыг нэмэгдүүлэх талаар харилцан ярилцаж, санал солилцов.
