“ӨНДӨР НАСНЫ ТЭТГЭВРИЙГ ОЙЛГОХ НЬ: ТҮҮХЭН ЗАМНАЛ, ЗОРИЛТ, ШИНЭЧЛЭЛИЙН БОДЛОГУУД” СЕМИНАР БОЛЛОО
Дэлхийн банкны дэмжлэгтэйгээр Гэр бүл, хөдөлмөр, нийгмийн хамгааллын яамнаас 2025 оны 06 дугаар сарын 26-ны өдөр “Өндөр насны тэтгэврийг ойлгох нь: Түүхэн замнал, зорилт, шинэчлэлийн бодлогууд” сэдэвт семинарыг зохион байгууллаа.
Тус семинарт УИХ-ын Нийгмийн бодлогын байнгын хороо, Гэр бүл, хөдөлмөр, нийгмийн хамгааллын яам, Нийгмийн даатгалын үндэсний зөвлөлийн дэргэдэх Мэргэжлийн хороо, Нийгмийн даатгалын ерөнхий газар зэрэг байгууллагын холбогдох албан хаагчид, арилжааны даатгалын компанийн төлөөлөл 21 аймаг, 9 дүүргийн Нийгмийн даатгалын газрын дарга нар цахимаар оролцов.
Олон улсад ахмад настны амьдралын баталгааг хангахад тэтгэврийн олон төрлийн тогтолцоог хэрэгжүүлж, ахмад настны тэтгэвэрт гарсны дараах амьжиргааг зохистой түвшинд барьж, даатгалын системийг хэрхэн тэнцвэртэй байлгахын тулд бодлогын зорилтоо хэрхэн тодорхойлох талаар арга хэрэгслийг ашигладаг гэдгийг дээрх сургалтаар онцоллоо. Тухайлбал тэтгэврийн шинэчлэлийн бодлогыг тодорхойлохдоо өндөр насны тэтгэвэр тогтоолгох ердийн нас, өндөр насны тэтгэвэр эрт тогтоолгох нас, тэтгэврийн доод хэмжээ, тэтгэврийг индексжүүлэх болон шимтгэлийн хувь хэмжээ зэргийг харгалзан үздэг байна. Энэ удаагийн сургалт дараах сэдвийн хүрээнд холбогдох мэргэжилтэн, албан хаагчдад мэдээлэл хүргэлээ. Үүнд:
- Тэтгэврийн тогтолцооны төрлүүд
- Тэтгэврийн бодлого, практикийн олон улсын туршлага: Түүхэн замнал, одоо ба ирээдүй
- Хамралтыг нэмэгдүүлж, албан бус байдлыг бууруулах нь
- Тэтгэврийн шинэчлэлийн асуудлууд-олон улсын түвшинд зэрэг болно.
Гэр бүл, хөдөлмөр нийгмийн хамгааллын яамнаас олон давхаргат тэтгэврийн тогтолцоог бүрдүүлэхийн тулд Нийгмийн даатгалын шинэчилсэн багц хуульд нэмэлт өөрчлөлт оруулах тухай болон Хувийн нэмэлт тэтгэврийн тухай хуулийн төслийг УИХ-д өргөн барихаар ажиллаж байна.
Энэ ч утгаараа энэ удаагийн сургалт ач холбогдолтой боллоо.
