“ҮЙЛДВЭРЛЭЛИЙН ОСОЛ, МЭРГЭЖЛЭЭС ШАЛТГААЛСАН ӨВЧНИЙ ДААТГАЛ, УРЬДЧИЛАН СЭРГИЙЛЭХ ТОГТОЛЦООНЫ ОЛОН УЛСЫН ТУРШЛАГА” СЭДВЭЭР УУЛЗАЛТ ЗОХИОН БАЙГУУЛЛАА
Нийгмийн даатгалын ерөнхий газарт “Үйлдвэрлэлийн осол, мэргэжлээс шалтгаалсан өвчний даатгал ба урьдчилан сэргийлэлтийн тогтолцооны олон улсын туршлага” сэдэвт уулзалтыг 2026 оны 3 дугаар сарын 11-ний өдөр зохион байгууллаа.
Уулзалтад Гэр бүл, хөдөлмөр, нийгмийн хамгааллын яам, Нийгмийн даатгалын ерөнхий газар, Хөдөлмөрийн аюулгүй байдал, эрүүл мэндийн төвийн төлөөллүүд болон ХАБЭА-н олон улсын зөвлөх Доктор Хелмут Нольд, Доктор Линда Матисане нар оролцлоо. Уулзалтыг нээж Нийгмийн даатгалын ерөнхий газрын дарга Б.Батжаргал Монгол Улсын үйлдвэрлэлийн осол, мэргэжлээс шалтгаалсан өвчний даатгалын талаар, Хөдөлмөрийн аюулгүй байдал, эрүүл мэндийн төвийн дарга Д.Нарансүх “Үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх ХАБЭА-ийн зөвлөн туслах үйлчилгээний чадавх бэхжүүлэх төсөл”-ийн талаар танилцуулав.
ХАБЭА-н олон улсын зөвлөх Доктор Хелмут Нольд Холбооны Бүгд Найрамдах Герман Улсын үйлдвэрлэлийн ослын даатгалын тогтолцоо, урьдчилан сэргийлэх, сэргээн засах үйл ажиллагаа, ХАБЭА-н олон улсын зөвлөх Доктор Линда Матисане Бүгд Найрамдах Латви Улсын үйлдвэрлэлийн осол, мэргэжлээс шалтгаалсан өвчний даатгал, хөдөлмөрийн аюулгүй байдал, эрүүл ахуйн үйл ажиллагааны санхүүжилт, эрсдэлтэй ажлын байрны жагсаалтын талаар мэдээлэл өгөн сонирхсон асуултад хариулж, харилцан ярилцав.
Үйлдвэрлэлийн осол, мэргэжлээс шалтгаалсан өвчний даатгал ба урьдчилан сэргийлэлтийн тогтолцооны талаар талууд харилцан туршлага солилцож, цаашид хамтран ажиллахаар боллоо.
