ЭРҮҮЛ МЭНДИЙН МАГАДЛАЛЫН ЧИГЛЭЛЭЭР ЦАХИМ УУЛЗАЛТ ЗОХИОН БАЙГУУЛАВ

Тус газрын дэргэдэх Эрүүл мэндийн магадлалын төв зөвлөлийн 2025 оны үйл ажиллагааны товч тайлан, 2026 оны онцлох ажлууд, цаашид анхаарах асуудлын талаар 2026 оны 01 дүгээр сарын 09-ний өдөр аймаг, дүүргийн Нийгмийн даатгалын газрын дэргэдэх Эрүүл мэндийн магадлалын зөвлөлийн дарга, магадлагч эмч нартай цахим уулзалт зохион байгуулав.

Нийгмийн даатгалын байгууллагаас 2026 оныг “Ёс зүй, сахилга, хариуцлага, хяналт, бүтээмжийг дээшлүүлэх” жил болгон зарласантай холбоотой аймаг, дүүргийн Эрүүл мэндийн магадлалын зөвлөлийн дарга, гишүүдэд авлига, ашиг сонирхлын зөрчлөөс урьдчилан сэргийлэх, сахилга, хариуцлага, бүтээмжийг дээшлүүлэх, эрүүл мэндийн магадлалын үйл ажиллагааг боловсронгуй болгох цахим шинэчлэл, дотоодын хяналтыг сайжруулж, гарч болох алдаа зөрчлөөс урьдчилан сэргийлэх, даатгуулагч хүний хөдөлмөрийн чадвар алдалтын хувь, хугацааг шийдвэрлэх үйл ажиллагааг холбогдох дүрэм, журмын хүрээнд хүртээмжтэй, чирэгдэлгүй үзүүлэхэд анхаарч ажиллах талаар Эрүүл мэндийн магадлалын төв зөвлөлийн дарга Т.Лхагвадорж чиглэл, зөвлөмж өгч онцлов.