ХӨДӨЛМӨРИЙН ЧАДВАР АЛДСАН ДААТГУУЛАГЧДАД ҮЗҮҮЛЭХ СЭРГЭЭН ЗАСАХ ТӨВ БОЛОН СУВИЛЛЫН ХҮРТЭЭМЖ НЭМЭГДЛЭЭ

Нийгмийн даатгалын ерөнхий газраас даатгуулагчид үйлдвэрлэлийн осол, мэргэжлээс шалтгаалсан өвчний үеийн сэргээн засах тусламж, үйлчилгээний хүртээмжийг нэмэх хүрээнд сэргээн засах төв болон сувиллын сонгон шалгаруулалтыг 2025 онд хоёр удаа зохион байгуулж нийт 11 сувилалтай хамтран ажиллах гэрээ байгуулан ажиллаж байна.  Ингэснээрээ Хөдөлмөрийн чадвар алдсан даатгуулагчид үзүүлэх сэргээн засах тусламж, үйлчилгээний хүртээмж нэмэгдэж байгаа юм. Дараах нэр бүхий 11 сувилалд Хөдөлмөрийн чадвар алдсан даатгуулагчид тусламж үйлчилгээ авах боломж бүрдэж байна. Үүнд:

1. “Багануур сувилал” ХХК /Багануур дүүрэг/
2. “Эрдэнэт” сувиллын цогцолбор /Орхон аймаг/
3. “Тулга” сувилал /Дархан-Уул аймгийн Шарын гол сум/
4. “Оргил” рашаан сувилал /Хан-Уул дүүрэг/
5. “Альфа Медикал Центр” ХХК-ийн сэргээн засах төв /Баянгол дүүрэг/
6. “Галт Халуун Рашаан” ХХК /Хөвсгөл аймгийн Галт сум/
7. “Ананд Хужирт” ХХК-ийн Рашаан Сувилал /Өвөрхангай аймгийн Хужирт ус /
8. Сэргээн Засах Клиник Эмнэлэг /Хан-Уул дүүрэг/
9. Уламжлалт Анагаах Ухаан Технологийн Хүрээлэнгийн Ургамал сувилал /Баянзүрх дүүрэг/
10. “Арга билэг” сувилал /Төв аймаг/
11. “Хос Шинэс” сувилал /Сүхбаатар дүүрэг/

Өнөөдөр Нийгмийн даатгалын ерөнхий газрын дарга Б.Батжаргал дээрх сувиллуудтай гэрээ байгууллаа. Энэ удаагийн сонгон шалгаруулалтаар Хөвсгөл, Төв, Өвөрхангай аймгийн нутаг дэвсгэрт үйл ажиллагаа явуулдаг сувиллууд шалгарсан нь Үйлдвэрлэлийн осол,  мэргэжлээс шалтгаалсан өвчний улмаас хөдөлмөрийн чадвар алдсан даатгуулагчид үзүүлэх сэргээн засах болон сувиллын тусламж, үйлчилгээг ойртуулснаараа ач холбогдолтой боллоо. Мөн төрөлжсөн сэргээн засах тусламж, үйлчилгээ үзүүлдэг “Альфа медикал” сэргээн засах төв шалгарсан юм.

Нийгмийн даатгалын ерөнхий газартай хамтран ажиллахаар болсон 11 сувилалттай Нийгмийн даатгалын ерөнхий газрын дэргэдэх Эрүүл мэндийн магадлалын төв зөвлөлөөс Үйлдвэрлэлийн осол, мэргэжлээс шалтгаалсан өвчний  даатгалын сангаас санхүүжих сувиллын ажиллах зарчим, анхаарах асуудлын талаар сургалт хийж, зөвлөмж, чиглэл өгч ажиллалаа.