ХУУЛЬ ЗҮЙН МЭДЛЭГ ДЭЭШЛҮҮЛЭХ ЭЭЛЖИТ СУРГАЛТЫГ ЗОХИОН БАЙГУУЛЛАА

Нийгмийн даатгалын байгууллагад холбогдох гүйцэтгэх баримт бичгийн шийдвэр гүйцэтгэх үйл ажиллагаа эрчимжүүлэх хүрээнд “Шүүхийн шийдвэр гүйцэтгэх ерөнхий газар”-тай хамтран ажиллах санамж бичиг байгуулсан. Энэ ажлын хүрээнд нийгмийн даатгалын шимтгэлийн өрийг барагдуулах ажлыг эрчимжүүлэх зорилгоор “Өмгөөллийн цэгц хүч” ХХН-тэй хамтран ажиллаж “Төлбөр төлөгч хуулийн этгээд болон төлбөр төлөөгч иргэнээс төлбөр гаргуулах ажиллагаа” сэдэвт сургалтыг зохион байгууллаа.

Сургалтын эхэнд Нийгмийн даатгалын ерөнхий газрын Хяналт шалгалтын газрын дарга С.Лхагвадорж албан хаагчдад “Итгэлцлийн аян”-ы үр дүнгийн талаар танилцуулан, цаашид нийгмийн даатгалын шимтгэлийн хуримтлагдсан өрийг барагдуулах ажлыг эрчимжүүлж ажиллахыг онцоллоо.

Нийгмийн даатгалын албан хаагчдын хууль зүйн мэдлэг дээшлүүлэх энэ удаагийн сургалтыг Дотоод хэргийн их сургуулийн Иргэний шийдвэр гүйцэтгэлийн тэнхимийн профессор, доктор  (Ph.D), хурандаа Я.Батгэрэл явуулж, албан хаагчдад хууль эрх зүйн мэдээлэл хүргэн, сонирхсон асуултад хариулт өгч ажиллав. Сургалтад төв, орон нутгийн нийгмийн даатгалын байгууллагын холбогдох чиг үүргийн албан хаагчид танхим болон цахимаар оролцлоо.