ХАМТРАН АЖИЛЛАХ САНАМЖ БИЧИГ БАЙГУУЛЛАА

Нийгмийн даатгалын ерөнхий газраас Нийгмийн даатгалын хууль тогтоомжийг ажил олгогч, даатгуулагч, харилцагч, олон нийтэд сурталчлах ажлыг шат дараатай зохион байгуулж байна.

Энэ хүрээнд өнөөдөр /2025.04.10/ Нийгмийн даатгалын ерөнхий газар, Монгол улсын их сургуулийн Бизнесийн сургуультай хамтран ажиллах санамж бичигт гарын үсэг зурлаа. Тус үйл ажиллагаанд Нийгмийн даатгалын ерөнхий газрын дарга Б.Батжаргал, холбогдох газар, хэлтсийн дарга нар болон Монгол улсын их сургуулийн Бизнесийн сургуулийн захирал профессор Н.Батнасан, холбогдох газрын мэргэжилтнүүд оролцлоо.

Хамтын ажиллагааны санамж бичгийг байгуулснаар талууд Нийгмийн даатгалын хууль тогтоомж, журам, дүрмийн талаар оюутан суралцагч, багш, ажилтан, албан хаагчдад сургалт зохион байгуулах, зөвлөгөө өгөх, нийгмийн даатгалын үйлчилгээг сурталчлан танилцуулах, багш, эрдэмтэн, судлаачдын дунд эрдэм шинжилгээний бага хурал, хэлэлцүүлэг зохион байгуулах, Нийгмийн даатгалын чиглэлээр оюутан, суралцагч, багш нарын судалгааны ажил, үйлдвэрлэлийн дадлага хийхэд дэмжлэг үзүүлэх, сургалт, судалгааны ажлын шинэ дэвшилтэт санал, санаачилгын талаар зөвлөгөө өгөх, мэдээлэл солилцох чиглэлээр хамтарч ажиллах юм. Санамж бичгийг үр дүнд хүргэхийн тулд, хэрэгжүүлж байгаа ажлын үйл явцын мэдээллийг тогтмол солилцож, хяналт тавьж ажиллахаар боллоо.