УНГАР УЛСАД АЖИЛЛАЖ АМЬДАРЧ БАЙГАА МОНГОЛЧУУДДАА МЭДЭЭЛЭЛ ХҮРГЭЛЭЭ
Нийгмийн даатгалын ерөнхий газар Монгол Улсаас Унгар Улсад суугаа Элчин сайдын яамтай хамтран Унгар Улсад оршин суугаа иргэдэд нийгмийн хамгаалал (тэтгэвэр, тэтгэмж)-ийн асуудлаар 2025 оны 7 дугаар сарын 6-ны өдөр цахимаар зөвлөгөө, мэдээлэл өглөө.
Энэ үйл ажиллагааг Нийгмийн даатгалын ерөнхий газрын Үйлчилгээ хөгжүүлэлт, олон нийттэй харилцах газрын дарга Д.Цэцэгбадам нээж, холбогдох газрын мэргэжилтнүүд Олон улсын хэлэлцээр, Сайн дурын даатгал, Тэтгэврийн даатгалын асуудлаар мэдээлэл өгч, цахимаар оролцож байгаа иргэдийн сонирхсон асуултад хариуллаа.
Нийгмийн даатгалын байгууллага нийгмийн даатгалын хууль тогтоомжийн хэрэгжилтийг хангах, олон нийтэд сурталчлах ажлыг шат дараатай зохион байгуулж байна. Үүний дотор хилийн чанадад ажиллаж, амьдарч байгаа Монголчуудынхаа нийгмийн хамгааллын асуудлыг шийдвэрлэх, тэдэнд нийгмийн асуудлаа шийдэх ямар боломж, бололцоо байгаа талаар мэдээлэл өгөх цахим уулзалтыг цаашид тогтмол зохион байгуулахаар төлөвлөн ажиллаж байна.