СУРГАЛТ ЗОХИОН БАЙГУУЛЛАА
Нийгмийн даатгалын ерөнхий хууль болон Засгийн газрын 2024 оны 254 дүгээр тогтоолоор баталсан холбогдох журамд нийгмийн даатгалын сангийн чөлөөт үлдэгдлийг найдвартай, үр өгөөжтэй, ил тод, хараат бус байх зарчмыг баримтлан Засгийн газрын үнэт цаас, Монголбанкны үнэт цаас худалдан авах, Төрийн сангийн нэгдсэн дансанд байршуулах мөнгөн хадгаламж, банкны системд нөлөө бүхий арилжааны банканд мөнгөн хадгаламж хэлбэрээр байршуулах гэсэн 4 төрлийн санхүүгийн хэрэгсэлд хөрөнгө оруулахаар хуульчилсан.
Энэ хүрээнд Нийгмийн даатгалын сангийн 2025 оны төсвийн тухай хуульд заасны дагуу Засгийн газар болон Монголбанкны үнэт цаас авахад зарцуулах хөрөнгийн дээд хэмжээг 300.0 тэрбум төгрөг байхаар тогтоосон. Иймд Нийгмийн даатгалын ерөнхий газраас үнэт цаас худалдан авах нээлттэй арилжаанд оролцох бэлтгэл ажил хангах хүрээнд албан хаагчдын дунд “Хөрөнгийн зах зээлийн оролцогчид ба хөрөнгө оруулалтын хэлбэрүүд” сэдэвт сургалтыг өнөөдөр /2025.05.15/ зохион байгууллаа.
Сургалтыг “Ашид ассет менежмент” үнэт цаасны ХХК-ийн гүйцэтгэх захирал Г.Золжаргал, Сангийн менежер, Хөрөнгө оруулалтын зөвлөх Б.Батгариг, “Гүүдсек” үнэт цаасны ХХК-ийн гүйцэтгэх захирал Ү.Энхтайван нар явуулж, Үнэт цаасны арилжаа, арилжааны процесс, Хөрөнгийн зах зээлийн оролцогчдын эрх, үүрэг, Үнэт цаасны хөрөнгө оруулалтын төрлүүд болон хөрөнгө оруулалтын менежмент, шийдвэр гаргалт зэрэг хөрөнгийн зах зээлийн талаарх анхан шатны мэдлэгийг албан хаагчдад олгосон юм.
Хамтран зохион байгуулсан “Ашид ассет менежмент” үнэт цаасны ХХК, “Гүүдсек” үнэт цаасны ХХК-ийн хамт олонд талархал илэрхийлье.
