САНХҮҮ, ЭДИЙН ЗАСГИЙН ИХ СУРГУУЛЬТАЙ ХАМТЫН АЖИЛЛАГААНЫ САНАМЖ БИЧИГ БАЙГУУЛЛАА.
Нийгмийн даатгалын ерөнхий газраас Нийгмийн даатгалын хууль тогтоомжийг ажил олгогч, даатгуулагч, харилцагч, олон нийтэд сурталчлах ажлыг шат дараатай зохион байгуулж байна.
Энэ ажлын хүрээнд /2026.06.25/ Нийгмийн даатгалын ерөнхий газар Санхүү, эдийн засгийн их сургуультай “Хамтын ажиллагааны санамж бичиг”-ийг байгууллаа. Энэхүү үйл ажиллагаанд Нийгмийн даатгалын ерөнхий газрын дарга Б.Батжаргал, Санхүү, эдийн засгийн их сургуулийн ректор Б.Мөнхбаяр болон холбогдох газрын дарга, мэргэжилтнүүд оролцлоо. Санамж бичгийг байгуулсанаар талууд дараах чиглэлээр хамтран ажиллахаар боллоо.
- Нийгмийн даатгалын салбарын тулгамдаж буй асуудлыг шийдвэрлэхэд эрдэмтэн, судлаачид, мэргэжлийн ажилтнуудын хамтын оролцоог бий болгож, эрдэм шинжилгээний болон олон талт сургалт, хэлэлцүүлэг хамтран зохион байгуулах;
- Нийгмийн даатгалын салбарын хүний нөөцийг бэлтгэх, албан хаагчдыг сургах, мэргэшүүлэх, чадавхжуулах, бүртгэл санхүү, сэтгэл судлал, программ хангамжийн зэргийн болон богино хугацааны сургалтуудад хамруулах;
- Оюутан залуусын ажлын гарааг зөв системтэй бэлтгэх, ажлын бодит туршлага хуримтлуулах, багаар ажиллах чадвараа дээшлүүлэх зорилгоор Санхүү, эдийн засгийн их сургуулийн ажлын байранд суурилсан дадлагажих хөтөлбөрт нэгдэх;
- Нийгмийн даатгалын хууль, тогтоомжийг хэрэгжүүлэхтэй холбогдуулан батлагдсан тогтоол, дүрэм, журмын талаар Санхүү, эдийн засгийн их сургуулийн багш, ажилтнууд, суралцагсад болон олон нийт, зорилтот бүлэгт зориулан сургалт зохион байгуулах, зөвлөгөө өгөх, нийгмийн даатгалын үйлчилгээг сурталчлан таниулах.
Хамтын ажиллагааны санамж бичгийн хүрээнд хийж хэрэгжүүлэх үйл ажиллагаануудыг талууд хэлэлцэж, ажлын төлөвлөгөө хамтран боловсруулан хэрэгжүүлэхээс гадна ажлын үйл явцын мэдээллийг тогтмол солилцож, хяналт тавьж ажиллахаар боллоо.
