Салбар болон аймаг, дүүргийн Эрүүл мэндийн магадлалын зөвлөлийн дарга, гишүүдтэй цахим уулзалт зохион байгууллаа

Нийгмийн даатгалын ерөнхий газраас эрүүл мэндийн магадлалтай холбоотой эрхзүйн баримт бичгийг боловсронгуй болгох, даатгуулагч, хүний хөдөлмөрийн чадвар алдалтын хувь, хугацаа, шалтгааныг шийдвэрлэж буй үйл ажиллагааны өнөөгийн байдалд үнэлэлт дүгнэлт өгөх, эрүүл мэндийн магадлалын үйл ажиллагааг сайжруулах арга зам, цаашдын бодлого чиглэлийг тодорхойлох,  зөвлөлийн гишүүдийг чадавхижуулах, мэргэжил арга зүйн удирдлагаар хангах, авлига ашиг сонирхлын зөрчлөөс урьдчилан сэргийлэх, соён гэгээрүүлэх зэрэг ажлуудыг тасралтгүй зохион байгуулж байна.

Энэ хүрээнд Нийгмийн даатгалын ерөнхий газрын дарга салбар болон аймаг, дүүргийн 32 Эрүүл мэндийн магадлалын зөвлөлийн дарга, гишүүд 300 гаруй төлөөлөлтэй цахим уулзалт хийлээ.

Уулзалтаар Нийгмийн даатгалын ерөнхий газраас эрүүл мэндийн магадлалын эрх зүйн орчин болон үйл ажиллагааны шинэчлэлийн чиглэлээр баримталж буй бодлого, нийгмийн даатгалын болон холбогдох хууль тогтоомжийн хэрэгжилтийг хангах, хөдөлмөрийн чадвар алдалтаар улсын дундажаас өндөр байгаа аймгуудыг хөдөлмөрийн чадвар алдалтыг бууруулах, урьдчилан сэргийлэх чиглэлээр эрүүл мэндийн байгууллагатай хамтран санал санаачлага гарган ажиллах, авлига ашиг сонирхлын зөрчлөөс ангид байж, төрийн албан хаагчийн болон эмнэлгийн мэргэжилтний ёс зүйн хэм хэмжээг чанд мөрдөж, ажиллахыг анхааруулав.

Сүүлийн 5 жилийн тайлангаас үзэхэд нийт хөдөлмөрийн чадвар алдсан иргэдийн тоо өмнөх оны мөн үетэй харьцуулахад 0.07 хувиас 4.5 хувиар буурсан үзүүлэлттэй, улсын хэмжээнд нийт хүн амд эзлэх хувь 2.9 байна.