“Нийгмийн хамгааллын тухай Монгол Улс, Бүгд Найрамдах Австри Улсын Засгийн газар хоорондын хэлэлцээр” 2026 оны 08 дугаар сарын 01-ний өдрөөс хүчин төгөлдөр болж байгаатай холбогдуулан Нийгмийн даатгалын ерөнхий газраас 2026 оны 07 дугаар сарын 24-ний өдөр цахим сургалт зохион байгууллаа. Сургалтад аймаг, дүүргийн Нийгмийн даатгалын газрын дарга, хэлтсийн дарга, байцаагч, мэргэжилтэн зэрэг 102 албан хаагч оролцлоо.
Сургалтаар Бодлогын хэрэгжилт, төлөвлөлтийн газрын дарга Ц.Ганцэцэг “Нийгмийн хамгааллын тухай Монгол Улс, Бүгд Найрамдах Австри Улсын Засгийн газар хоорондын хэлэлцээр”-ийг хэрэгжүүлэхэд анхаарах асуудлын талаар, тухайлбал Хэлэлцээрийн хамрах хүрээ, тэтгэвэр тогтоох, олгох, шимтгэл төлж, ажилласан хугацааг нэгтгэн тооцох, Хэлэлцээрийн хүрээнд хэрэглэх маягтуудыг хэрхэн хөтлөх зэрэгт тодорхой чиглэл, зөвлөмжийг өгч холбогдох асуултуудад хариуллаа.
Бүгд Найрамдах Австри Улсад Монгол Улсын 2668 иргэн оршин сууж байгаагаас 1696 нь ажил хөдөлмөр эрхэлж байна. Түүнчлэн Монгол Улсад Бүгд Найрамдах Австри Улсаас 100 орчим хүн ажиллаж, амьдарч байна. Цаашид иргэдийн зорчих, оршин суух хөдөлгөөн ихсэж байгаатай холбогдуулан энэ тоо өсөх хандлагатай байна.
Иймд Хэлэлцээр хэрэгжсэнээр хоёр улсын иргэд Монгол Улс болон Бүгд Найрамдах Австри Улсад шимтгэл төлж, ажилласан давхардаагүй хугацаагаа нэгтгэн тооцуулж тэтгэвэр тогтоолгох, мөн тухайн улсад шимтгэл төлж ажилласан хугацаандаа ногдох тэтгэврийг шилжүүлэн авах нөхцөл бүрдэж, нийгмийн баталгаа нь хангагдах юм.
