НИЙГМИЙН ДААТГАЛЫН ХАМРАЛТ ӨСӨЖ БАЙНА

Нийгмийн даатгалын ерөнхий газрын Бодлогын хэрэгжилт, төлөвлөлтийн газраас Нийгмийн даатгалын хамралтын 2026 оны эхний улирлын дүнгийн талаар цахим хурал зохион байгууллаа. Хуралд Бодлогын хэрэгжилт, төлөвлөлтийн газрын дарга Ц.Ганцэцэг болон холбогдох мэргэжилтнүүд, аймаг, дүүргийн Нийгмийн даатгалын газрын дарга нар, орлого, хамралтын хэлтсийн дарга нар, холбогдох байцаагч, мэргэжилтнүүд нийт  85 хүн оролцлоо.

2026 оны эхний улирлын байдлаар нийгмийн даатгалд хамрагдсан ажил олгогч, албан журмын болон сайн дурын даатгуулагчийн тоо өмнөх оны мөн үетэй харьцуулахад өссөн үзүүлэлттэй гарлаа. Тухайлбал, ажил олгогчийн тоо 57794 болж өмнөх оны мөн үеэс 1177 ажил олгогчоор, албан журмын даатгуулагчийн тоо 899354 болж 8947 даатгуулагчаар, сайн дураар даатгуулагчийн тоо 125717 болж 38007 даатгуулагчаар тус тус нэмэгдсэн дүнтэй байна.

Цахим хурлаар цаашид хамралтыг нэмэгдүүлэх, SICOS системийн хүрээнд хамралтын тоо болон зарим тоон мэдээллийг сум бүрээр гаргадаг болгох талаар аймаг, дүүргийн Нийгмийн даатгалын газруудаас гаргасан саналыг  хүлээн авч, шийдвэрлэх, цаашид хэрэгжүүлэх арга хэмжээний талаар санал солилцон, холбогдох үүрэг, чиглэл өглөө.