НИЙГМИЙН ДААТГАЛЫН САЛБАРЫН АЛБАН ХААГЧИД ТӨРИЙН ЖИНХЭНЭ АЛБАН ХААГЧИЙН ТАНГАРАГ ӨРГӨЛӨӨ
Монгол улсын Ерөнхийлөгчийн 2024 оны 82 дугаар зарлигаар шинэчлэн баталсан “Төрийн жинхэнэ албан хаагчийн тангараг өргөх ёслолын журам”-ын дагуу өнөөдөр Нийгмийн даатгалын ерөнхий газар болон дүүргийн Нийгмийн даатгалын газруудын 20 албан хаагч Төрийн жинхэнэ албан хаагчийн тангараг өргөлөө.
Тангараг өргөх ёслолын ажиллагаанд Гэр бүл, хөдөлмөр, нийгмийн хамгааллын яамны Төрийн нарийн бичгийн дарга Л.Мөнхзул, харъяа агентлагийн удирдлагууд болон Нийгмийн даатгалын ерөнхий газрын Захиргаа, удирдлагын газрын дарга Б.Даваахүү нар оролцож, Төрийн нарийн бичгийн дарга Л.Мөнхзул төрийн албаны ерөнхий болон тусгай шалгалтаа амжилттай өгч, төрийн жинхэнэ албан хаагч болсон нийт албан хаагчдад өргөсөн тангарагтаа үнэнч байж, ажил үүргээ хуулийн хүрээнд хариуцлагатай гүйцэтгэхийг хүсэж, ажлын амжилт хүслээ.
Мөн Нийгмийн даатгалын салбарт ажиллах шинэхэн төрийн жинхэнэ албан хаагчдыг Даргын зөвлөлийн гишүүд хүлээн авч, Нийгмийн даатгалын үйлчилгээг шинэ түвшинд гаргах, төрийн үйлчилгээг ажил олгогчид, даатгуулагчид, харилцагчдад түргэн шуурхай үзүүлэх, ашиг сонирхолын зөрчлөөс ангид, нээлттэй, ил тод ажиллаж өөрсдийн мэдлэг ур чадвараа дайчлан, нэгэн зорилгын төлөө хамтдаа ажиллахыг Нийгмийн даатгалын ерөнхий газрын дарга онцоллоо.
Төрийн жинхэнэ албан хаагчийн тангараг өргөсөн нийгмийн даатгалын салбарын нийт албан хаагчиддаа ажлын амжилт хүсье.
