НИЙГМИЙН ДААТГАЛЫН БАЙГУУЛЛАГЫН АЛБАН ХААГЧИД АВЛАГА БУУРУУЛАХ АРГА ЗҮЙН ЗӨВЛӨГӨӨ АВЛАА

Ажил олгогч нийгмийн даатгалын шимтгэлээ төлөөгүйн улмаас даатгуулагчид нийгмийн даатгалын үйлчилгээ авч чадахгүй, хохирч үлддэг. Тиймээс нийгмийн даатгалын байгууллага даатгуулагчдын эрх ашгийг хамгаалах, тэдэнд нийгмийн даатгалын үйлчилгээг түргэн шуурхай, чирэгдэлгүй хүргэхэд анхаарч 2025 оныг “Даатгуулагчийг дэмжих, Нийгмийн даатгалын шимтгэлийн өрийг барагдуулах” жил болгон зарласан.

Зорилтот жилийн хүрээнд Нийгмийн даатгалын үндэсний зөвлөлийн дэргэдэх Мэргэжлийн хорооноос системийн хэмжээнд үүсээд байгаа авлагыг барагдуулах авлагын менежментийн сургалтыг өнөөдөр /2025.05.16/ зохион байгууллаа. Сургалтад Нийгмийн даатгалын ерөнхий газар болон 9 дүүргийн албан хаагчид танхимаар, 21 аймгийн албан хаагчид цахимаар хамрагдлаа.

Нийгмийн даатгалын шимтгэлийн авлагын хэмжээг бууруулснаар даатгуулагчдын тэтгэвэр, тэтгэмжийг цаг хугацаанд нь олгох, санхүүгийн эрсдэлээс хамгаалах, нийгмийн баталгааг хангах нөхцөл бүрдэх юм.