НИЙГМИЙН ДААТГАЛЫН БАЙГУУЛЛАГА ҮЙЛ АЖИЛЛАГААНДАА RPA РОБОТ ПРОЦЕССЫН АВТОМАТЖУУЛАЛТЫГ НЭВТРҮҮЛЖ, АШИГЛАЖ БАЙНА
Нийгмийн даатгалын байгууллага нь байгууллагын дотоод үйл ажиллагааг боловсронгуй болгох, албан хаагчдын ажлын ачааллыг бууруулах, ажлын бүтээмжийг нэмэгдүүлэх, төрийн үйлчилгээний чанар, шуурхай байдлыг сайжруулах зорилгоор RPA буюу робот процессын автоматжуулалтын технологийг үйл ажиллагаандаа үе шаттайгаар нэвтрүүлж эхлээд байна.
Тодруулбал, 2025 оны 12 дугаар сарын 18-ны өдрөөс эхлэн RPA системийг туршин ажиллуулж, Шилэн дансны тухай хуулийн хэрэгжилтийг хангах хүрээнд тодорхой үйл ажиллагаанд ашиглаж байна. Энэ хүрээнд Нийгмийн даатгалын сангийн “Цалингийн зардлаас бусад таван сая төгрөгөөс дээш үнийн дүн бүхий орлогын мөнгөн гүйлгээ”, “Цалингийн зардлаас бусад таван сая төгрөгөөс дээш үнийн дүн бүхий зарлагын мөнгөн гүйлгээ” зэрэг мэдээллийг Shilen.dans.gov.mn цахим системд байршуулдаг үйл ажиллагааг бүрэн автоматжууллаа.
Өмнө нь дээрх мэдээллийг албан хаагчид гараар нэг бүрчлэн боловсруулж, системд шивж оруулахад өдөрт дунджаар 2-3 цаг зарцуулдаг байсан бол робот процессын автоматжуулалтыг нэвтрүүлснээр мэдээллийг ердөө 1 минутын дотор хүний оролцоогүйгээр автоматаар байршуулдаг боллоо.
Цаашид Нийгмийн даатгалын байгууллага нь цахим шилжилтийн хүрээнд үйл ажиллагааныхаа бусад чиглэлд робот процессын автоматжуулалт болон хиймэл оюун ухаанд суурилсан шийдлүүдийг үе шаттайгаар нэвтрүүлж, төрийн үйлчилгээг иргэдэд илүү хүртээмжтэй, шилэн, ил тод, авлигагүй, хүнд сурталгүй, түргэн шуурхай хүргэхэд анхааран ажиллах болно.
