НДЕГ-ЫН ДАРГА Б.БАТЖАРГАЛ ДАРХАН-УУЛ, ОРХОН, БУЛГАН АЙМАГТ АЖИЛЛАЛАА

Нийгмийн даатгалын ерөнхий газрын дарга Б.Батжаргал болон холбогдох газрын дарга, мэргэжилтнүүд 2026 оны 03 дугаар сарын 13-ны өдрүүдэд Дархан-Уул, Орхон, Булган аймгийн Нийгмийн даатгалын газар болон Шарын гол сумын Нийгмийн даатгалын тасагт ажиллаж, байгууллагын үйл ажиллагаатай танилцлаа.

Энэ хүрээнд 2026 оны Нийгмийн даатгалын байгууллагын зорилт, нийгмийн даатгалын сангийн орлогын төлөвлөгөөг ханган биелүүлэх, шимтгэлийн өр барагдуулах ажлыг эрчимжүүлэх, даатгуулагч иргэдэд үзүүлэх үйлчилгээний чанар, хүртээмжийг сайжруулах чиглэлээр албан хаагчдад мэдээлэл өгч, санал солилцон цаашид хэрэгжүүлэх ажлын талаар үүрэг, чиглэл өглөө. Нийгмийн даатгалын үйлчилгээг ил тод, нээлттэй, шуурхай хүргэх, байгууллагын ёс зүй, сахилга, хариуцлагыг эрхэмлэхийн зэрэгцээ 2026 онд цахимжилтын ажлыг эрчимжүүлж, зарим төрлийн тэтгэвэр, тэтгэмжийн хүсэлтийг цахимаар хүлээн авах нөхцөлийг бүрдүүлэхээр ажиллаж байгааг онцоллоо. Түүнчлэн иргэдэд хүргэх мэдээлэл, зөвлөгөөг сайжруулах, орон нутгийн байгууллагуудын хамтын ажиллагааг бэхжүүлэх чиглэлээр анхаарч ажиллахыг холбогдох албаныханд үүрэг болголоо.

Мөн Нийгмийн даатгалын ерөнхий газрын дарга Чингис хаан банкнаас авах өрийн төлбөрийг барагдуулах зорилгоор тус банкнаас санал болгосон үл хөдлөх хөрөнгөтэй танилцаж, цаашид ашиглалт, хамгаалалт болон үр ашигтай ашиглах боломжийн талаар Дархан-Уул аймгийн Засаг дарга Б.Азжаргалтай уулзан санал солилцлоо.

Түүнчлэн Орхон аймагт Чингис хаан банкнаас санал болгож буй үл хөдлөх хөрөнгө, Булган аймагт байрлах Капитал банкны өр төлбөрт шилжиж ирсэн үл хөдлөх хөрөнгө, барилга байгууламжуудтай газар дээр нь танилцаж, тэдгээрийн ашиглалт, цаашид үр ашигтай ашиглах боломжийн талаар аймгийн Нийгмийн даатгалын газрын удирдлагуудтай ярилцаж, санал солилцов. Дээрх үл хөдлөх хөрөнгийн талаарх мэдээллийг Нийгмийн даатгалын үндэсний зөвлөлд танилцуулж, Нийгмийн даатгалын байгууллагад шилжүүлэн авах асуудлыг тус зөвлөлөөр шийдвэрлүүлэхээр төлөвлөж байна.