“МОНГОЛ УЛСЫН ЗАСГИЙН ГАЗАР, БҮГД НАЙРАМДАХ КАЗАХСТАН УЛСЫН ЗАСГИЙН ГАЗАР ХООРОНДЫН ТЭТГЭВРИЙН АСУУДЛААР ХАМТРАН АЖИЛЛАХ ТУХАЙ ХЭЛЭЛЦЭЭР”-ИЙГ ХЭРЭГЖҮҮЛЭХ АСУУДЛААР ЦАХИМ УУЛЗАЛТ ЗОХИОН БАЙГУУЛЛАА
“Монгол Улсын Засгийн газар, Бүгд Найрамдах Казахстан Улсын Засгийн газар хоорондын тэтгэврийн асуудлаар хамтран ажиллах тухай хэлэлцээр”-ийг 2026 оны 04 дүгээр сарын 01-ний өдрөөс хэрэгжүүлж эхлэхтэй холбогдуулан Бүгд Найрамдах Казахстан Улсын Хөдөлмөр, хүн амын нийгмийн хамгааллын яамны төлөөлөлтэй 2026 оны 03 дугаар сарын 26-ны өдөр ээлжит цахим уулзалтыг зохион байгууллаа. Уулзалтад Нийгмийн даатгалын ерөнхий газрын дарга Б.Батжаргал, Бүгд Найрамдах Казахстан Улсын Хөдөлмөр, хүн амын нийгмийн хамгааллын яамны Нийгмийн хамгаалал, нийгмийн даатгалын газрын дэд захирал Хасенова Баян Зарлыковна болон холбогдох мэргэжилтнүүд оролцлоо.
Уулзалтаар Хэлэлцээрийг хэрэгжүүлэх эрх бүхий байгууллагуудын мэдээллийг албан бичгээр харилцан солилцох, Хэлэлцээрийг хүрээнд хэрэглэх маягтуудыг цахимаар болон шуудангаар солилцох, Бүгд Найрамдах Казахстан Улсын тэтгэврийн хуримтлалын сангаас олгох тэтгэврийг шилжүүлэн авах өргөдлийн маягтыг хэрхэн солилцох талаар тус тус санал солилцов.
Нийгмийн даатгалын ерөнхий газрын дарга Б.Батжаргал аймаг, дүүргийн нийгмийн даатгалын газруудын тэтгэвэр тогтоолт, олголт хариуцсан байцаагч, мэргэжилтнүүдэд Хэлэлцээрийг хэрэгжүүлэхтэй холбогдуулан цахим сургалт зохион байгуулахаар төлөвлөж байгаа талаар мэдээллээ.
