МОНГОЛЫН ҮЙЛДВЭРЧНИЙ ЭВЛЭЛИЙН ХОЛБООТОЙ ХАМТРАН АЖИЛЛАХ САНАМЖ БИЧИГ БАЙГУУЛЛАА
Ажил олгогч нийгмийн даатгалын шимтгэлээ төлөөгүйн улмаас даатгуулагчид нийгмийн даатгалын үйлчилгээ авч чадахгүй, хохирч үлддэг. Тиймээс нийгмийн даатгалын байгууллага даатгуулагчдын эрх ашгийг хамгаалах, тэдэнд нийгмийн даатгалын үйлчилгээг түргэн шуурхай, чирэгдэлгүй хүргэх чиглэлд анхаарч 2025 оныг “Даатгуулагчийг дэмжих, Нийгмийн даатгалын шимтгэлийн өрийг барагдуулах” жил болгон зарласан.
Энэ хүрээнд өнөөдөр /2025.04.24/ Монголын үйлдвэрчний эвлэлийн холбоотой хамтран ажиллах санамж бичгийг байгууллаа. Тус үйл ажиллагаанд Нийгмийн даатгалын ерөнхий газрын дарга Б. Батжаргал болон холбогдох газрын дарга нар, Монголын үйлдвэрчний эвлэлийн холбооны дэд ерөнхийлөгч Б.Рагчаа болон холбогдох төлөөллүүд оролцлоо.
Хамтын ажиллагааны гол зорилго нь нийгмийн даатгалын талаарх сөрөг ойлголтыг засах, өр авлагыг бууруулах, ажил олгогчдод нийгмийн даатгалын шимтгэлээ төлөх зөвлөмж мэдээлэл хүргэх, даатгуулагчдад нийгмийн даатгалын үйлчилгээг түргэн шуурхай олгоход чиглэх юм. Мөн Нийгмийн даатгалын багц хууль, түүний ач холбогдол, нийгмийн даатгалын өнөөгийн байдал, цаашдын чиг хандлагыг сурталчлан таниулахад хамтран ажиллана.
Санамж бичгийн хэрэгжилтийн талаарх мэдээллийг хоёр байгууллага цахимаар солилцож, сар тутам ажлын явцыг дүгнэх юм.
