МОНГОЛЫН МЭРГЭШСЭН НЯГТЛАН БОДОГЧДЫН ИНСТИТУТТЭЙ ХАМТРАН АЖИЛЛАЖ БАЙНА.

Тус газар нь Монголын Мэргэшсэн Нягтлан Бодогчдын Институттэй 2024 оноос “Хамтын ажиллагааны санамж бичиг” байгуулсан.

Санамж бичгийн хүрээнд нийгмийн даатгалын байгууллагын албан хаагчдын мэргэжил, мэргэшлийг дээшлүүлэх, мэргэшсэн нягтлан бодогчийн эрх олгох сургалтад хамруулах ажлуудыг зохион байгуулан ажиллаж байна.

Мэргэшсэн нягтлан бодогчийн эрх олгох шалгалтад бэлтгэх цахим сургалтад нийгмийн даатгалын байгууллагын нийт 75 ажилтан, албан хаагчид хамрагдан өнөөдөр сургалт эхэллээ.

Сургалттай холбоотой цахим уулзалтыг 03 дугаар сарын 10-ны өдөр зохион байгуулж, Нийгмийн даатгалын ерөнхий газрын Захиргаа, удирдлагын газрын дарга Б.Даваахүү, Монголын Мэргэшсэн Нягтлан Бодогчдын Институтийн Сургалт, судалгаа, стандарт хариуцсан дэд захирал Б.Батцэцэг нар оролцон сургалтын талаар мэдээлэл, зааврыг өгч, албан хаагчдын асуултад хариуллаа.