МОНГОЛЫН ДААТГАЛЫН ХОЛБООНЫ ТӨЛӨӨЛЛҮҮДТЭЙ УУЛЗЛАА
Гэр бүл, хөдөлмөр, нийгмийн хамгааллын яамнаас Хөдөлмөрийн аюулгүй байдал, эрүүл ахуйн хуулийн шинэчилсэн найруулгыг боловсруулж байгаа. Хуулийн шинэчлэлийн хүрээнд дагалдах хуулиуд болох Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хууль, Даатгалын тухай хуульд нэмэлт, өөрчлөлт оруулах нөхцөл үүссэн тул Монголын даатгалын холбооны ерөнхийлөгч Т.Батзул болон хувийн даатгалын байгууллагуудын төлөөллүүдийг өнөөдөр /2025.04.25/ хүлээн авч уулзлаа.
Уулзалтаар хуульд нэмэлт өөрчлөлтөөр оруулах санал, хөдөлмөрийн аюулгүй байдлаа ханган ажиллаж байгаа ажил олгогчдыг хэрхэн дэмжих, даатгуулагч үйлдвэрлэлийн осолд өртсөн тохиолдолд үйлдвэрлэлийн осол, мэргэжлээс шалтгаалсан өвчний даатгалын сангаас үзүүлж байгаа үйлчилгээнээс өөр даатгалын үйлчилгээг хувийн даатгалын байгууллагууд үзүүлэх нөхцөл боломжийн талаар ярилцсан юм. Энэхүү уулзалтаас гарсан гарц шийдлийг ажил хэрэг болгох үүднээс хоёр тал ажлын хэсэг байгуулан ажиллахаар тохиролцов.
